小豬碧碧: 1月 2008

2008年1月31日星期四

肥may生日~Oliva

星期日(27/1) 同catherine 補祝生日

我地約咗係荃灣廣場的 Oliva.
http://www.openrice.com/restaurant/sr2.htm?shopid=17179

當然有帶埋阿b 去, catherine 最鍚佢

七個女仔加一個B

食物味道幾好. 不過都係一d heavy 野. 會好漏.

牛油焗田螺味道幾好. 不過每人得一粒.
pizza 百幾蚊就有咁大盤. 我地都食唔哂. 好抵
小食拼盤和豬肋骨都好味. 但又未算突出

還叫咗四碟飯麵

我鍾意食個南瓜汁車輪粉. 阿B就鍾意食墨魚汁意粉
而個雜菌意大利粉我覺得唔好味. 食的口感不好. 又唔香

不過阿B 當晚好嘈. 玩得最開心就係佢. 直情好似飲醉咗咁.

又笑得大聲. 有時仲尖叫

不過埋單時有少少問題. 因為我有張優惠咭. 話食滿300蚊有八折
而我BOOK枱時我都有問佢. 佢都話有折

但埋單時就話優惠只係得星期一至五. 仲話係佢地同事唔知

咁唔知就可以亂答人GE 咩. 最後我一蚊都冇得折. 激死

那兒D 環境太黑.同埋D 枱比較迫.我地冇係餐廳影合照
唯有去番商場噴水池度影

不過又唔係有咩靚裝飾.冇端端一班人影相.有D 奇怪

2008年1月29日星期二

焗紅豆芝士餅 (附食譜)

成個一月，頭三個星期都冇整蛋糕

但係一下子我上個星期內就整咗五個．　簡直痴咗線

不過能逗得朋友或家人開心．　再累．　再凍　（洗碗時）　你都會覺得值

今次整咗呢個焗紅豆芝士餅．　但我冇份食

因為整俾男友同事生日．　不過我撩咗少少痴係蛋糕模邊的來試味．　勁重紅豆味呀！　正

但就唔知成件食會否太甜．　因為男友都冇食．　成個餅俾朋友拎咗番屋企．評語仲未傳番黎

希望壽星女鍾意ｌａ

餅底材料 : ( 6 吋份量 )

芝士餅底碎 90 克無鹽牛油 (座溶) 45 克 ( 你亦可減餅底碎 60 克 / 牛油 30 克 )

芝士餡材料 : ( 6 吋份量 )

忌廉芝士 150 克 (室温) 砂糖 60 克雞蛋 (打散/室温) 2 隻紅荳茸 150 克

雲呢拿香油半茶匙低筋粉 (篩好) 半湯匙

做法 :

(1) 首先將6吋模圈用鍚紙包好四周邊及底部，再放一塊鐵片在底部。

(2) 牛油座熱加入餅底碎內 (拌勻)，再放入模圈內用匙壓實、壓平餅底碎 ~ 備用。

(3) 預熱焗爐 175 - 180 火 / 15 分鐘 ( 但要注少許水在烘盤內 ) 。

(4) 放入忌廉芝士+砂糖+雲呢拿香油在缸內用 (1号速) 打至軟身成糊狀。

(5) 放入雞蛋~打散 ( 分2-3 次 ) 加入芝士糊內攪拌至均，刮下紅邊芝士漿。

(6) 再加入低筋粉 (篩好) 拌勻，然後分成 2 份芝士糊。

(7) 一份芝士糊加入『紅荳茸』攪拌勻成紅豆芝士糊及另一份不需加任何東西芝士糊。

(8) 將一半份量【紅豆芝士糊】倒入模圈內，再分散倒入一半份量【芝士糊】在模內，用筷子

稍微攪畫幾下成不規花紋。

(9) 將剩餘份量【紅豆芝士糊】倒入模內，再放入剩餘【芝士糊】在模內，用筷子稍徽攪再畫幾下。

(10) 放入焗盤上 ( 已預先焗盤上再注入少許水 ) ~ 中層及以 180 度火 / 焗 45 - 50 分鐘至變成棕色。

(11) 從焗爐取出蛋糕，放涼大約 45-60 分鐘後，再放入雪櫃冷藏大約4小時後取出及脫膜即可。

2008年1月27日星期日

朱古力草莓忌廉蛋白甜餅 (附食譜)

今次係1 月份圖書館管理員生日會呀!!

原本今個月得兩個學生生日.我都有諗過好冇2月先一齊攪

但諗諗下. 係人都唔想遲咁多先有蛋糕食la. 反正我都係為咗玩

一於照開

今次胆粗粗.新嘗試. 整蛋白餅

結果不算太成功. 但也不失敗. 只是不夠好囉!!

其實都知自已個蛋白打得唔夠. 但打咗好耐.都冇點變.諗住是但

焗的時候變得勁大. 霸哂成個盤. 點知焗完縮哂水. 一pat 野. 似外星pizza

不過, 加番d cream 和士多啤梨. 成個樣即刻唔同哂

口感. 餅底痴痴的. 有點似綿花糖. 雖然甜了點. 但拼埋cream 和士多啤梨

個味道又好好喎!!好特別呀!!

仲有幾個同學話要添食呢. 呵呵!!

未鋪cream前的外星pizza, 係咪見到都唔開胃. haha

《情牽甜品》

材料:

蛋白                 3個
幼砂糖             150g
可可粉             2湯匙 (篩勻)

餅面:

鮮忌廉             1杯(打至濃稠及軟滑) ( 我用了甜忌廉)
草莓                 隨意 (原食譜係覆盆子 450g)
黑朱古力碎     25g (我都唔記得落)

做法:

1. 蛋白打至挺身

2. 幼砂糖逐次加入蛋白內, 打至挺身及有光澤

3. 加入可可粉, 輕輕拌勻

4. 將蛋白混合物塗在牛油紙上成直徑20cm的圓形, 中央成凹陷狀。放入預熱焗爐內以150c 焗1小時,待涼。

5. 均勻灑上糖霜, 將己打起之忌廉塗在蛋白中央位置

6. 加入草莓及朱古力碎於表面, 即成

2008年1月25日星期五

麻甩House 聚餐~ 大榮華

星期五幾名同事突然即興話星期六 (19/1) 去大榮華食飯
http://www.openrice.com/restaurant/sr2.htm?shopid=6952

問完我去唔去之後. 第二句就係問有冇阿b

所以今次飯聚就當成幾位會員麻甩hse 的會員飯局. 呵呵

佢地一見到阿b 就抱過不停. 你手交我手. 我手又交佢手. 表姐就一定唔抱佢la. 咁重!

呢晚4個女仔 +榮榮+ 阿b

食咗好多野. 好好味呢

五味雞必叫. 大蝦伊麵都好正. 阿b 食咗兩碗麵呢

砵仔飯黎到點會唔試. 最唔好味就係個西蘭花. 淡patpat

金沙骨係出奇咁好味喎!! 原來有咸蛋王. 叫時都唔知呢!

鯪魚球都好味.個面勁脆. 但d 蜆蚧醬就唔夠濃味. 差了少少

最後的甜品是馬拉糕和送的糖水. 一樣咁good

食完個個都勁飽

食完又係玩阿b 的時間

不過途中唔乖. 亂扔野. 俾表姐鬧

即場表演俾各會員睇名劇 "扮可憐" , 博得三個會員的心. 係咁話要錫番

扮可憐谷眼淚連環四格

2008年1月22日星期二

三絲炒烏冬 (附食譜)

近排唔知點解好似冇咩心機寫BLOG 咁

連巡BLOG 都只係睇朋友及相熟的BLOG友就算.....

加上家中電腦壞了.呢排應該都會見少咗我蒲頭.

唉........冇心機冇心機 ........唔知點解

入番主題. 又係我煮便當給榮榮減輕內疚感的時候

今次睇食譜. 見到個三絲炒烏冬. 係用罐頭的炒三絲煮

咁啱屋企有一罐 (應該買咗一排. 不過未過期).
加些椰菜 (屋企有一棵用剩的娃娃菜, 代替咗佢得la )
及之前去工展會買壽桃牌又送咗一包烏冬. 全部材料都唔駛買. 簡直Fit 哂.

榮榮話味道幾好. 不過一個烏冬似乎太少. 唔係好夠飽呢!! (女仔應該就夠卦)

《便當cook 得起》

材料 : (1 人份)

罐頭炒三絲                    半罐
椰菜                                1/4個 , 切絲 (我用咗娃娃菜)
烏冬                                1個
甘筍絲                            10 g (我冇落)
蒜茸                                1茶匙

調味料 :

鹽                                   1茶匙
XO醬                             1茶匙
雞粉                               1/2茶匙
豉油                               2茶匙

做法 :

1. 下1湯匙油起鑊, 爆香蒜茸, 下椰菜及甘筍絲炒熟

2. 再下罐頭炒三絲及烏冬,兜炒片刻。 (要先灼開烏冬. 隔水。)

3.下調味料, 兜炒, 上碟, 即成

2008年1月20日星期日

寫真B

這幾天家中電腦壞了, 冇得執相. 冇得寫Blog．和巡blog .在家中悶死了

今天襯係媽咪屋企拿拿聲upload 埋d 相.出篇blog 先

呢d 相係九月是係一間影樓影ge.
(係我join咗一個會藉的禮物. 價值二千幾喎!!可以攞番六張相,但其實邊值二千幾啫)

影咗廿幾張. 揀六張都揀咗好耐. 有d 始終不是太靚
9月影相.10月揀相. 要到一月先可以拎相呢!!

睇番. 那時的阿b 好瘦啊!! 面仔勁尖. 現在好得多了.

這張我晒了最大張做油畫

不過唔駛錢影就當然唔好蝕la. 都叫做為阿B 留個童年回憶ma !!

2008年1月14日星期一

台式肉燥飯 (附食譜)

上個月開始join 咗california. 所以要規定自己每星期起碼要去到兩天做運動

(咁先唔會蝕ma. 而且真係要郁下la. 幾十年未有郁過. 哈哈!!)

加上有時又同朋友去下街. 食下飯. 攪到呢......就成日扔底咗榮榮係屋企

佢返輪班工作. 見面已經少了. 我仲成日走咗去. 陪唔到佢食飯

為咗將自已的內疚感減少d .我就整定一d 便當俾佢當晚餐. 咁佢就唔駛食飯盒la

而且我又有得玩下. (雖然會累少少)

呢個食譜我係跟Miss Jubie ga.

超得喎!! 做法又簡單.個味道又好. good ! good ! good ! 我都好想食呀!!

食譜copy 自miss jubie. 不過我就加咗隻辣椒落去一齊炒. 而唔係裝飾

材料： (2人份量)

半肥瘦碎豬肉---1 lb
紅葱頭---6粒 (切成碎粒)
蒜頭---6瓣 (切成蒜蓉粒)
紅辣椒---1隻 (斜切成片, 裝飾用)

調味料：

老抽---1 tablespoon (亦可省掉)
生抽---2 tablespoon
砂糖---2 tablespoon
胡椒粉---適量

做法：

1. 碎豬肉用調味料醃一會, 備用

2. 較中火燒紅個Pan, 加油, 爆香蒜頭及紅葱頭, 再放碎豬肉炒勻

3. 加入一碗水, 慢火煮至碎豬肉熟透及汁液稠杰就ok

4. 大碗內鋪上白飯, 加入肉燥, 用少許紅辣椒片鋪上面作裝飾,完成 !

2008年1月12日星期六

芥末薯仔沙律 (附食譜)

有一日去燉奶佬食下午茶. 想食西多又想食沙律. 所以問下有冇得加埋一齊.

佢話加六蚊. 咁我都ok. 點知......黎到. d 沙律得手板大咁少.....

六蚊喎!! 而家d 沙律好貴咩....攪錯

夜晚忍不住. 自已整黎食. 買幾蚊薯仔再加雞蛋和栗米. 己經整到一大盤. 加埋先十幾蚊......啍!!

呢個沙律材料不多. 但個汁較特別. 加埋芥末. 口味都幾好呢!!

《三餐》

材料:

薯仔                          2個 (約300g)
雞蛋                          5隻
栗米                          隨意 (呢項我自己加的)

調味料:
沙律醬                      6湯匙
芥末粉                      1 1/2湯匙 (我用了英式芥末醬. 呢度用的不是wasabi)
糖                              4 1/2茶匙
鹽                              1/2 茶匙
蒔蘿(Dill)                  1/2 湯匙 (我沒有落, 因為都唔知咩黎)

做法:
1. 薯仔加蛋齊水烚約10-15分鐘。瀝乾水置涼。

2. 薯仔去皮切丁粒。蛋去殼切丁粒 ( 我係烚薯仔之前, 己經去咗皮)

3. 將所有材料混合拌勻, 試味。雪凍即可

TIPS:

芥末不要放太多. 否則會帶苦味. 所以最好逐少加. 逐次試味達自己喜歡的味道