情人節的主菜和甜品 ......都不太好味
隻雞我地前一兩日就周圍搵.因為唔知邊度有得賣
最後係吉之島找到呢隻有機雞. 約1KG. 要六十幾蚊
但平時只係整雞脾雞翼的我. 見到成隻雞時.我覺得好肉酸. 唔想掂佢個頭.同摷佢個身.所以最後叫咗榮榮幫我醃咗佢. (同埋隻雞好肥...
)
其實味道都OK . 但就唔知點解焗極都唔熟. 一開始已經用200C 火焗40分鐘.
出爐.個胸位有D 唔熟. 反轉佢再焗多10分鐘
跟住個脾位都係未熟.跟住斬件再焗. 唉...... (已經問過人. 話應該係個脾位度界兩野)
不過係斬件之前都影咗張相.
之後的甜品--心太軟.第二次整. 在甩模時還是整爛了
上次雖然都係爛咗. 但都好好味.
諗住今次換個食譜試試. 點知甜到嘔......
雖然在情人節. 榮榮咁啱放假可以陪到我. 但佢那天不舒服
在等食的中途去了眠一眠. 但對於我.....雖然明白係唔舒服. 但都好似有D唔開心咁
加上D 野食又攪成咁 (我係一整唔到唔好就會好失落的人)
不過點都好.呢餐飯我係地兩個第一次一齊煮的.
(平時係我煮.佢洗碗, 今次係兩份煮. 但都係佢洗碗. 哈哈
)
情人節我同榮榮唔想出去迫. 而且就算出去食都唔係有d 咩選擇. 仲要貴好多
所以我地兩個決定留番係屋企玩煮飯仔 (情人節.....過咗咁耐先寫
)
不過今年要返工. 我又手腳慢. 都好怕要好夜先有得食
所以前兩天已經準備緊d 食材. 諗住可以快d
點知．都係九點先開得飯law..... 唉
前菜係呢個燒蒜蓉青口 .係跟頭條日報的食譜
都幾易整同好味. 不過就略咸咗d . 下次要減番調味先得
| 材料 | ||
急凍青口 12隻
|
| 製法 |
1. 青口解凍後，沖水，吸乾水份，灑上調味，備用。
|
繼上次的酒心朱古力後
我地同一日仲整咗呢個Brandy Truffles. 呢個我覺得會煩少少
要加其他野去溝勻.再雪得軟硬適中後. 便可切粒或搓圓
最後沾上可可粉便完成. 口感有點似雪吻
但吃時冇酒味的. 兩者之間. 我較愛吃之前的酒心朱古力
不過可可粉可能沾得太多. 食時居然給嗆到了. 真白痴.
食譜COPY 自小魚仔
材 料 : ( 大 約 份 量 15 - 18 粒 )
淡忌廉 60 克 ( 座熱 ) 66% Valrhona Dark Choc 黑朱古力 175 克 ( 座熱 / 切碎 )
白蘭地酒 4 克 (可用其它酒代替) ** 無鹽牛油 15 克 ( 室温 ) 可可粉 ( 無糖 ) / 薛好 ~ 適量
做 法 :
(1) 將黑朱古力切碎 及 ( 隔水座溶 ) / 淡忌廉 (隔水座熱 ) 。
(2) 用鐵匙將朱古力慢慢攪拌完全溶及滑身，再加入已座熱的淡忌廉 (分幾次加入) 落去攪拌至暖身 。
(3) 將軟身無鹽牛油 (室温) 加入朱古力漿內不停輕輕攪拌至均 。
(4) 再加入白蘭地酒落朱古力漿內攪拌至滑身 。
(5) 然後放入冰格櫃內冷藏至凝固 ( 不宜雪太久/太硬身 ) ~ 大約 5 - 10 分鐘 (天氣熱可雪耐少少) ** 。
(6) 取出巳凝固朱古力分成 15 - 18 粒等份 (可搓成圓球形 或 不同形狀) 。
~ 不宜在手上太久 ( 因手上熱力會令朱古力溶 ) ~
(7) 將朱古力球放入己薛好可可粉內....黏滿可可粉即可，然後用紙模撻盛起放在陰涼地方貯存 。
過兩天. 我還用了carmen 的麵包超人模來整埋朱古力 (把剩下少許的酒心餡用掉)
甩出來.好靚. 但始終粒朱古力太厚. 吃時都幾漏
呢d 野都係小吃多滋味
好耐冇係呢個分類度打個blog
唔代表我脾氣好咗冇咒人. 有時只係懶得打上來
圖書館成日都有好多人漏底野. 冷衫.風褸呢d唔少得
手襪．頸巾都執到．不過全都冇人認領
有時係圖書館會見到朱古力．媽咪麵碎夾係ｄ書度
見到會好火．我會咒佢地狂生痱滋．係圖書館食野呀la. 仲要夾係我d 書度!!
不過今日見到樣野仲奇怪
我剛剛巡書架. (放學時間)居然見到有一隻短身絲襪係個特大書架度(較後排)
嘩!! 好想嘔呀!! 
係咪變態ga?? (呢d 都係失物????)
比我知道係邊個.就腳都斬咗佢. 呢d野除咗就扔去垃圾筒la. 扔係個書架度做咩
不過我都好難知個原兇ga la. ....
所以都係咒咒咒. haha
我咒扔呢隻絲襪ge 人. 會生滿腳毛,好似猩猩咁.仲要抆極都有. 激光都整唔甩. 哈哈哈!! 死未?
我諗係女仔的話. 咁多腳毛真係慘過俾人斬咗隻腳呀.
成個新年假期. 我都係度玩煮野食咁滯
初三玩完蘿蔔糕. 初四又約咗emily 教佢整蛋糕
咁carmen 又話得閒. 我地又再諗玩其他野
以前剪低的報紙. 有個士多啤梨撻. carmen 話想試
我冇所謂. 雖然見到個食譜話要落500ml 忌廉, 我就知我一定唔食 (我唔飲奶的)
我最重要都係玩啫
個食譜話要加d 士多啤梨果醬落個餡度. 但根本就好難攪勻
個撻出到黎一d 粉紅色都冇. (報紙張相夠胆死係深粉紅色)
更加唔好話士多啤梨味. dddddd都冇, 奶味就勁重. (佢地話我聽. 我邊夠胆食)
變成鮮奶撻.
個食譜都唔掂ge. 唔打出來了
不過影相時切少少士多啤梨放上面. 個樣都呃到人
最後我地放棄. d 餡全部唔要. 將佢變做蛋撻
hehe. 呢個就好味得多la. 我都啱食. yeah!!
不過.仍覺得個皮唔夠脆
原本我地諗住玩好多野ga. 不過似乎高估咗自己. 時間不夠. 但carmen 又想試下佢新買的模. 所以俾咗包梅子綠茶果凍粉佢玩.
就咁溝埋就得. 唔駛煩
個麵包超人模勁靚啊!!
還有我喜愛的豬仔
呢個模整出來有個款. 都幾靚呀
未過年之前. 2/2 (sat) 就約咗emily 去怪師傅度學角仔
其實我婆婆都識整ga. 仲記得以前細個時會用個玻璃杯 幫佢轉個皮出黎俾佢包
係賀年的親子活動黎ga
不過. 現在婆婆年紀大. 己經好多年冇包la. 我唔想呢d 傳統野會唔識整
所以就特地去學來玩玩la
我由第一隻包得好肉酸.到之後每隻都有進步. 好好玩呀!!
希望下年可以自己整俾婆婆食
至於煎堆呢.以前已經學過蓮茸煎堆(有餡). 但呢次係學空心煎堆
不過發現包都唔係最難. 最難係炸. 我學完都好似唔係太掌握到啊!!
但算la .我又唔係成日實習ge .....hehe .即刻食勁好味呀!!
我呢似都有d炸得唔好. 第最面那個最漲卜卜咋
過年. 個個都應該都會整番d賀年食品過下節啦!!
26/1 我就約咗小魚仔同 Ivy 去我屋企整年糕玩下
一日裡面就整咗蘿蔔糕. 芋頭糕和馬蹄糕
我三樣野都未試過整ga !!
不過發現事前功夫要整好耐. 只係切d 蘿蔔. 芋頭. 臘味. 批馬蹄就用咗成兩個鐘有多la
我地大約由2:00 左右開始整. 差不多整到七點幾. 整咗十幾底糕. 但係好滿足啊!!
好彩我借咗媽咪個電蒸籠先咁快蒸哂. 好可惜我跌爛咗. 要賠番一個新的俾媽咪........唉
首先出爐的是蘿蔔糕 . 正!! (我地係切絲. 唔係刨ga. 話唔會流失水份喎)
之後再來芋頭糕. 原來生芋頭係好難切ga. 真係辛苦哂 Ivy 啦!
最後是馬蹄糕. 大家都未整過呀 ! 整出來個樣係黃色. 唔太透明
初初還以為是失敗了. 但第二天煎來吃. 味道和酒樓的一樣啊!! 好好味呢!!
第二日早餐. 煎好的三款年糕. 味道一流
最後係度恭祝大家身體健康. 年年升績加人工.
小朋友快高長大. 貓地們肥肥白白 . 健健康康.
又係蛋糕 .呢一晚我一次整兩個. 整到半夜一點幾. 超級眼訓
呢個蛋糕係整俾榮榮嘅媽咪. 拍咗咁多年拖. 都係第一次整蛋糕俾佢媽咪
整咗好普通的甜忌廉蛋糕. 因為人人都啱食
其實呢個蛋糕d 味好似黑森林. 只不過冇整到啫喱. 同埋多咗d 朱古力忌廉
食落口都好好味
求其用士多啤梨裝飾. 點知拎到番學校. 有四五粒都跌咗出去. (抵受不住車程)
攪到d 忌廉花哂. 激死
《甜心美點》 6吋
材料 :
朱古力海綿蛋糕 3片
餡料 :
淡忌廉 100ml
黑朱古力(熱溶) 35g
罐裝櫻桃汁 50ml
櫻桃酒 1湯匙
罐裝櫻桃粒 200g
裝飾 :
甜忌廉 (打起) 150ml
黑朱古力片 適量
鮮果 適量
做法 :
1. 淡忌廉打起, 加入黑朱古力拌勻, 成朱古力忌廉備用
2. 罐裝櫻桃汁與櫻桃酒混合備用
3. 放一片蛋糕片於桌上,掃上櫻桃酒糖水
4. 塗上適量朱古力忌廉, 排上櫻桃粒。如法完成第2及第3層蛋糕
5. 蛋糕塗上甜忌廉, 加上裝飾, 完成
同catherine 食完飯. 之前當然有生日蛋糕la
因為佢都同我一樣唔食有奶味的蛋糕 , 所以芝士同慕絲蛋糕都唔會整
所以整咗呢個朱古力栗子班戟蛋糕--每層班戟都搽了薄薄 一層栗子茸
一d 奶味都冇ga
而且仲幾好味添!! 不過唔係好識得煎班戟. 所以有d 厚law
《情牽甜品》
朱古力班戟材料:
麵粉 100g
可可粉 25g
砂糖 2湯匙
鹽 少許
鮮奶 1杯
雞蛋 2個
牛油 25g (坐溶)
栗子忌廉材料:
栗子茸 3/4杯
砂糖 2湯匙
鮮忌廉 1/4杯
朱古力班戟做法:
1. 麵粉、可可粉、鹽及糖篩勻, 置於碗內
2. 鮮奶與雞蛋打勻, 徐徐拌入乾粉中至軟滑, 待30分鐘
3. 拌入牛油溶液,用平底鑊煎成薄餅, 備用
做法:
1. 栗子茸與糖打至滑
2. 加入鮮忌廉拌勻成餡料
3. 將適量栗子忌廉餡薄薄地塗在班戟上
4. 鋪上另一片班戟
5. 重覆以上步驟, 最後灑上糖霜裝飾即成
