小豬碧碧

2007年7月5日星期四

益力多芒果芝士餅

6月28號是我的好朋友Jess 生日.27號同佢慶祝咗.
但今天先有時間寫番個blog (同埋屋企部腦怪怪地. 攪到想寫都寫唔到)

雖然我知Jess 你唔係成日黎睇我個blog.但都講多次happy birthday 啦

我同呢位朋友仔己經識咗廿年啦.由小學一年級開始就一齊到而家
雖然出黎做野後少咗傾電話.但我地圍內一年都食幾次飯ga!!

知佢喜歡吃芒果.特地整咗呢個

益力多芒果芝士餅
不過呢個餅很奇怪.

首先我講下我落咗咩材料先.主要有　：　
忌廉芝士　　１００ｇ
芒果茸　　　９０ｇ
益力多　　　１支
淡忌廉　　　２５０ｍｌ
乳酪　　　　２０ｍｌ　（我落咗芒果味）　　　　

我初初仲怕好大陣奶味，因為成２５０ｍｌ　cream 喎!所以叫朋友試咗味先

點知佢地話冇奶味喎!!我試下啦.又真係冇喎.只係得乳酪同芒果味.(直情就係好似凝固版芒果乳酪咁)
仲要好滑.切的時候. 仲有d 震滕滕的感覺添呀!!!
而益力多味就只係聞到食唔到. 但乳酪就只係下了一湯匙.居然就充滿哂成個蛋糕的味道
你地話係咪好神奇呢??

不過可能益力多同cream 溝埋就好似乳酪咁味卦!!

今次用了半圓型模.甩模甩得唔係好靚.見到有條分界. 裝飾依舊放幾粒水果.但好似好單調咁

第二朝起身望來望去唔滿意.再灑d 星星糖下去先至出門口返工.
可惜星星抵受不住天氣炎熱和路途遙遠的考驗. 星星糖溶掉了. 變到好似流星一樣
唯有對朋友話當係流星,許多幾個願 (真係當人傻ga 咩!!!)

未變流星前都幾靚ga. 變咗就.....冇謂影相la

:
整蛋糕的時候,有一part係叫用50g的糖+ 13ml 水混合,再放入微潻爐用120c加熱至透明糖漿狀.
點知第一次"叮" 唔夠,再"叮" 多一陣就燶咗la. 變咗淺啡色.
因為趕時間,咪唔理佢住再整多碗先囉!!點知個蛋糕攪點好哂.諗住洗碗的時候,先發現那半碗"焦糖" 居然變咗勁硬.用力篤都篤唔入. 最後要加d 熱水.慢慢整溶佢再慢慢洗.
我原本有諗過扔咗隻碗佢ga. 但又唔係好捨得.
最後辛苦哂榮榮幫我洗咗佢. (洗咗勁耐呀!!)

Emily Birthday ~ 大盛日本料理

Emily 生日.我地去咗觀塘間大盛度食飯.那兒出名都係大大件壽司.
http://www.openrice.com/restaurant/sr2.htm?shopid=15392
好可惜我唔俾佢地食刺身.佢地唯有食多幾舊飯.哈哈

不過那兒的座位比較迫.而且好多人.好彩我地有book 枱.唔係就要企係門口等位了

好能太多野做.服務都係一般.
我地要炸蝦壽司.佢比錯咗甜蝦壽司. 話俾佢聽.佢居然問我地可否要咗佢 (要唔係問題.要照計俾錢係問題law)

而且一生一熟.我地冇人啱食.所以堅持要換.
你落錯單.都冇理由要客人夾硬要ga ma

其他食物都幾好味.不過我覺得好似尖沙咀店好味d

2007年7月4日星期三

你份工好得閒!!!

今日一個中一小朋友同我講:
miss，我覺得你份工好得閒呀．日日都只係對住部電腦同叫下我地做野．真係舒服．

聽到之後．心有點嬲嬲地．但因為佢係細路仔．我冇同佢講咁多

俾人話覺得我份工得閒．都唔係第一次了....

最慘仲係要俾d 老師話.而且唔係對住我講,係對d學生講.話我個位好舒服.係圖書館度"嘟嘟"下就得, 之後同我熟的學生就話番俾我聽.替我不值

聽到呢d就勁嬲啦!!仲話係老師.

自己唔知人地做咩,就係度亂話人.我又唔係同你好熟.我要做什麼工作你又知幾多??你眼見我就"嘟嘟"下囉!!背後做幾多野你又見唔見到呀!!

我唔係一個鍾意高調的人．
唔似得ｄ人做完少少野又走去周圍話俾人聽做咗,仲係人地面前走來走去,死話好忙好忙.
慌死人地聽唔到.重覆n咁多次

我自己做完自己知就可以.件事做得好就ok .自己就開心

如果我冇野做.
你估個圖書館d 書本本飲哂red blue送佢一對翼然後識全部飛上架?
個電腦又識得同本書say個 hi 就可以入哂資料?
班死野入黎係咪唔駛睇佢地違規?
仲有其他濕濕碎碎勁煩的程序要唔要我列個list出黎貼哂全校board 呀!!

永遠睇野就自己份工就最多野做.睇人地份工就好得閒.人地著數你蝕哂囉!!

碧碧真心話:
係呀係呀,學校個個月出糧俾我,我每日番黎都係係度對住部電腦打機ga 咋.好玩到仲日日打到六點幾. 5點放工都唔捨得走呀.

執書又好玩喎!執到好似苦力咁.好爽ga.仲可以令我隻手有關節痛添!!

勁正囉呢份工!!!

2007年7月2日星期一

學企

在廚房洗洗下碗, 望去芝士.點解啤梨企咗係度ge??
過去摸佢個頭仔.都唔縮番入去喎!!

碧碧: 做咩事呀??啤梨.
啤梨: 我係度訓練緊自己企耐d.

碧碧 : 企耐d ?? 貓地平時用四隻腳腳都可以企耐d ga la.做咩要用兩隻腳企啫?? (有本錢都唔識用)
啤梨: 因為你成日都帶埋d 又唔係高我好多.而又用兩隻腳企的 "東東"番黎.........(頭dup dup中)

碧碧聽得一舊雲.咩 "東東"呀 ? 唔通係話d小朋友
(因為屋企有麻甩b表弟.媽咪湊的兩兄弟.仲有瑩瑩表妹)

碧碧: 你話的"東東" 係咪指d小朋友呀?? 但你次次都惡佢地,佢地全部都好驚你ga 啦喎!!
咁關你兩隻腳企咩事啫??
啤梨: 因為兩隻腳企會高d.更具威嚇力

啤梨: 但我企得好攰啦....搵對手"掠住"下先

啤梨: 哎吔!!企到連條頸都 "梗梗" 地添呀!!

唔通我真係唔夠班" 東東" 鬥!!. 原來兩隻腳企係咁攰....好眼訓呀而家．．．．

碧碧: 其實佢地個個都驚咗你ga la. 你四隻腳係地下仲似獅子添!你幾時有　　　
　　　見過d獅子會企起度??咪就係馬戲團那些囉!! 所以,唔好咁傻豬.

啤梨：真係？？　咁我伏底抖抖先．咁你可唔可以唔好再帶佢地返黎屋企呀！！我唔鍾意呀！

碧碧：（唔識答）