木槺蛋糕

今次呢個木槺蛋糕係預備做給圖書館管理員的11月份生日會

因為今次有較多同學生日,所以整了個8吋的.平時我多數只整6吋.因為覺得8吋甩模時,我還未掌握得好.怕會整爛.(但今次很成功,好開心)
整的時候,成日怕最頂那層唔夠餅碎鋪滿,所以中間的層數都鋪得比較孤寒,唔算太多餅碎
點知,整完後發覺仲有小半盒餅碎呢.早知唔咁慳啦!!
或者下次可以買現成的餅碎,因為今次我買原塊的瑪莉餅,只係整碎佢,己經用咗一個鐘了.而且隻手也很累...
不太化算

木槺蛋糕

學生們都對呢個蛋糕激讚!!!!yeah

草餅

星期日下午見有少少得閒和精神.搵D野整下先
因為中秋節整冰皮月餅時剩番好多餡(有草莓味同蜜瓜味,原本仲有綠茶味,但冇理由個皮又綠茶個餡又綠茶),唔想浪費,而且都幾貴的.(同埋已經放咗成個月了)
再唔用,就要餵垃圾桶
所以今日用埋黎整草餅LA
不過係蒸個皮的時候,唔小心燙到了(雖然只係少少)---痛痛呢.
自已冇食過,因為鍾意食豆沙多D.但同事的評價都OK啊!
草餅

芝士椰菜花(附食譜)

星期日還是湊住兩兄弟,佢地話想食意粉,所以都係玩煮飯仔
但我6:00要陪個"表妹"去拎番隻貓,原本以為7:00我便可以回家.點知攪到成7:45分.
嘩!!!原來已經咁夜.好彩佢地話未餓.所以要快快手手
我整咗肉醬千層麵.兩兄弟見到覺得好疑惑問我點解係一塊塊.意粉不是一條條的嗎? (真好笑)
味道都幾好啊!!不過榮榮話唔夠飽喎!! (好彩我仲有包腸仔,煎埋佢)
肉醬千層麵

另外整多碟芝士椰菜花,不過我冇跟足份量落芝士.可能咁.所以有D淡.唔知加多少少鹽洽會否好些.或者都係唔好怕肥,照下那麼多芝士吧
很快做完的一碟菜.超簡單
芝士椰菜花

食譜
材料:
椰菜花1/2個 (用西蘭花都得)
車打芝士50g(切絲或刨碎)
做法:
1.先煲滾水,下少許油及鹽,烚熟椰菜花,隔水,盛起
2.把椰菜花平放微波爐盤內,並平均地鋪上芝士
3.以微波爐800 w焗約 2分鐘至芝士溶化及呈金黃色

pizza+ 香草咖喱雞翼 (附食譜)

今日應允了媽咪,今天和明天都會幫佢手湊兩兄弟.等她去游下乾水...
至於榮榮這兩天也放假....沒有得和他二人世界,希望他不會介意吧!!!
突然想今晚整pizza.便到百街買些火腿、菠蘿、蘑菇和意粉醬.把pizza鋪得超滿的.但又怕唔夠食,所以再整了雞翼.
我的超多料pizza

咖喱雞翼.我初初也担心他們吃不到辣,但原來都食到.只是細佬有點辛苦(因為佢平時唔係好食得辣,但他也吃了四隻.雖然之後狂飲冰水.還說嘴唇變了孖潤腸呢!!哈哈)
香草咖喱雞翼

香草咖喱雞翼                   食譜
材料:
雞中翼                               8隻
咖喱粉                               1湯匙
雜香草                               1湯匙
做法:
1.雞翼洗淨,以廚紙吸乾水份,加入少許鹽及胡椒粉調味
2.咖喱粉,雜香草混合,加入雞翼拌勻
3.以180c預熱焗爐,放入雞翼焗約15分鐘,即成

愛心早餐~自製豆漿+上海粢飯 (附食譜)

榮榮昨晚返通宵.今朝才回來.而我今天又調了假.所以....諗住整早餐俾佢食law
平時我們都只會去附近的茶餐廳食早餐.今天應該能給他驚喜吧!!!
特地晨早8:00就起身,就是要行去新北江買油炸鬼.然後又買榨菜和肉鬆
昨晚已經浸定了糯米和黃豆.所以回家便先把黃豆放入豆漿機.然後再蒸熟d糯米.
榮榮回來時,剛剛蒸好(時間預計得非常good呢)
然後再把其他材料包好便完成了.非常簡單.而且很好好味.因為下足材料,連頭尾都鋪滿榨菜和肉鬆.和街吃的味道一樣
上海粢飯

自製豆漿

上海粢飯      食譜
我參考《街頭小吃》但簡單化咗
材料:
糯米              250g
即食榨菜      1包(係雜貨店有得買.一蚊包)
油條              1條
豬肉鬆          4湯匙(可以隨意加多或減少,我自己就鍾意多d多d)
做法:
1.糯米浸6小時以上,瀝水,蒸約30分鐘至腍.
2.糯米飯分成2份,放保鮮紙上壓平
3.放上榨菜,油條及豬肉鬆,以保鮮紙捲成飯糰後按緊,即可享用