污糟貓

雖然貓是愛清潔的動物.但牠們也會冇意之間弄髒了地方.
例如:甩毛,去完廁所D沙撥哂出地咁.(這些都是要忍受或常清潔的)
但我的兩隻寶貝貓點解還要有些辟好.令到屋企更污糟呢!!
廚房地下是高危地方.因為牠們的糧水及廁所都在廚房
首被告:啤梨
罪名:玩屎

罪證記錄:試過係廚房地下有屎.廳有屎.最嚴重係試過係飯枱面有屎(他是"担"上去的嗎??)

次被告:豆豆
罪名:周圍嘔
罪證記錄:廚房地下,窗邊,遊戲機火牛,最嚴重係自己開廚房柜門.躲係入邊,嘔係我個酒架度(牠真是邊走邊嘔的啊!)

兩位大帝,放過我啦!!!

杏仁糊

雖然睇張相,覺得好似好滑咁.但其實唔係ga.內裡有d好微細的"渣".我隔了幾次都係咁
又試過放入豆漿袋.點知又"杰"得滯.根本漏唔出,或者下次試下用煲湯袋先
唔好以為我咁叻,其實我只係用糖水機整.部機成千蚊ga.
但買番黎都唔係用過好多次.最多就係整豆漿.所以咪拎出黎玩下law.下次再試過先.

同事話味道都ok ga.只係有少少渣.大家都接受到呢!!

霸道啤

每次邀請朋友回家.他們總是要求先要困啤梨在房
唉...其實我也不想這樣的.要牠自已一個"獨守空房"
但牠實在太惡死了,每次有陌生人進屋.牠都是一副戰鬥格樣子.而且還試過抓偒我的朋友
有一次我叫牠不準這樣嚇人.牠還好像不認得我似的.差點也抓到我了.好彩我縮得快呢!
上次alice和carmen來我家.我只是開房門取少少東西.她們只是見到啤梨有少少想出廳的姿勢.便立刻飛上梳化.好像見到動物園裡的老虎走出來咁
雖然啤梨是這樣的"霸道".但我仍是會愛鍚牠的.
「啤梨你要乖啊!!!唔係我就養多隻貓bb來激你了」

杏仁脆面櫻桃蛋糕 (附食譜)

其實呢個蛋糕已經係七月時整的了.是送俾paggie生日的呢!!不過見之前已打咗食譜,所以post埋上黎同大家分享下啦!

其實我係跟蔣怡本甜姐兒甜品整ga

由於佢原本的食譜分量係用杯的.我覺得比較難量,所以轉番用g 打出黎

呢個係6吋分量

蛋糕:
85g +1/2 湯匙牛油 (放軟)
75g 糖
135g 麵粉(篩過)
1 隻蛋
1 茶匙泡打粉
1 罐 櫻桃(隔水、去核，喜歡酒味的可用櫻桃甜酒泡半小時)
(這是8吋的分量,或可減半,但我自己整時就落哂,鋪滿個蛋糕)
1/2茶匙 混合香料粉

脆面:
28g 牛油(切成小塊、室溫下放軟)
30g 麵粉
16g 糖粉
1/4杯 杏仁
濃忌廉或雪糕(伴碟用)

蛋糕做法:
1.預烖焗爐至175c。在一個6吋蛋糕模周圍塗上1/2湯匙融化的牛油，底盤鋪上
牛油紙。
2.將軟化的牛油和糖混合，用打蛋器打到蓬鬆，加入雞蛋，打勻。慢慢加入麵粉
和泡打粉，用勺子攪拌均勻，但不要過份攪拌。
3.把一半的麵糊倒在蛋糕模內，上面鋪上櫻桃(如有浸酒的話應把酒隔去)，撒上
混合香料，再鋪上另一半麵糊。

杏仁脆面:
4.把軟化的牛油切入麵粉中，直到麵粉呈現麵包糠一樣的質感。加入糖粉和杏仁
片，攪拌均勻。
5.把麵粉混合物鋪在蛋糕糊表面，撒上混合香料粉。焗45分鐘左右，在中間插入
木籤，抽出來時沒沾到麵糊代表已熟。放20分鐘，待稍涼後脫模放在架上直至
原全冷卻。
6.可以趁熱吃，也可以放涼以後，或是冷藏以後吃。在蛋糕上加一球雪糕或一勺
打發的忌廉，味道更好

蘿蔔絲酥餅

夜晚,同兩兄弟打完羽毛球己經九點半.但之前學了蘿蔔絲酥餅.放工時又已經去買咗蘿蔔.好想實習一下.
所以回家.還是照樣開工
首先要整蘿蔔.切絲.飛水.然後加調味炒.但炒好轉碟時.有條蘿蔔"痴"咗係隻手度.勁熱呀!又"fing"唔走.又拎住隻碟喎!之後即刻紅哂呀!(痛痛)
接著來就要搓酥皮.反正整開,又冇理由整咁少,所以就加倍咗份量.點知搓好後,又唔記得咗.將佢地分割得勁大舊.攪到個皮超厚呢!好彩整咗三隻就發現錯誤.即時更正.先變番正常size
最後,便是要炸了(最担心的環節),用了差不多一支油.好彩都ok.冇燒咗個廚房
但和榮榮試味時,發覺好咸呢!!(但個酥皮就好好味)
可能係上次上堂學時.佢地話d餡好淡.所以我就加倍咗鹽的份量.但又變咗咸得滯.好彩都未致於話咸到苦.
但要倒定一杯水來食law.
還有潮式月餅未實習.找個星期天再試過.
夜晚整,實在時間冇多.昨晚做到一點半才可以瞓呢!!!累死了

領養貓貓

為咗個"表妹"呢兩日撲黎撲去.終放今日去拎貓貓啦!
睇中的貓仔叫miumiu.四個月大.好"da"人.去到新屋企.很快便八八卦卦的周圍走了,好似唔太驚呢!













去到負責人的屋企.有成約二十隻貓貓,其中有八隻是她自己的.其餘的待人領養.她們的愛心真的很偉大呢!!真感謝她們這麼好的對待流浪或受遺棄的貓貓.可以令到更多貓貓有幸福的家
其實我自已都睇中咗隻ga.佢得兩個月大.但如果再養埋佢便有三隻貓貓呢!!
真的要好好考慮一下先得.而且仲要得到榮榮的批準才行呢!

這就是我愛上的"糖糖",係咪好得意呢!!

後記:
係第二日考慮清楚.諗住要埋"糖煻"。仲諗住幫佢改名叫"芒果"
夜晚打電話俾lisa,點知"糖糖"已經俾人領養咗啦! 嗚.....

兩貓登場

其實呢兩隻貓已經養咗好耐,不過想係呢度介紹下俾大家認識
豆豆.六歲.女仔
兩歲大時佢主人唔知咩理由話不能再養佢.所以由我接收咗。
可惜佢天生怕人,養咗四年,我都冇咩機會抱過佢.佢絕對不會主動親近你.最多會係地下碌兩碌,己算十分俾面.行事非常緊慎.身邊人稍有郁動,佢即以九秒九跑回柜底.除非佢覺得你唔係想掂佢.咁都有時會坐定定俾你影下相.但多數都是不見踪影的.你只會發現多咗d屎,同少咗d糧.唔係太覺自己多咗隻貓

但佢個樣非常可愛

啤梨.就黎兩歲.女仔
未開眼時,連同另外兩隻貓bb被遺棄在垃圾房,俾我媽咪執咗番黎.再含辛茹苦咁用針筒餵奶餵大.可惜另外兩隻未能救回.只有啤梨能存活.
世界真的弱肉強食.bb時已經係佢最食得.又搶野食.又鍾意壓住其他兩隻貓黎瞓.亦由於佢花花碌碌.固曾有"霸皇花"的稱號

可能咁辛苦只係救番佢一個,幼貓時成日怕佢養唔大.買好多營養品佢食,攪到吸收過度.竟有一對修長的腿.model咁嘅身形.個個見到都問,點解你隻貓咁高嘅?
亦因為得番佢一個.我就當佢寶咁.令到佢以為自己係大小姐.將細個的霸道性格變本加厲.而家少少唔鍾意就打人.只會怕榮榮一個(但牠亦最鍾意榮榮)
平時最喜歡係我身上睡覺.同"担"野.好似D狗咁.試過最高記錄.佢張床度居然有一對毛毛拖鞋.一張地毯同一對 BOOT.全部用口"担"入去.勁!!!

紅豆綠茶蜂蜜鬆餅 (附食譜)

今天真是悶極了,天空陰陰的,這真是懶人的天氣
下午睡了兩個鐘的午睡,睡醒才只是五點多...算吧!整個鬆餅給明天做早餐,為自己打氣
紅豆綠茶蜂蜜鬆餅

《精巧甜品DIY 3》食譜
材料:
麵粉     115克
發粉     1/2茶匙
綠茶粉 5克
牛油     70克(軟化)
糖         35克
蛋         1隻
日式罐裝紅豆蓉     100克
蜂蜜     2湯匙
做法:
1.牛油、糖以打蛋器打發至奶白色。
2.加入蛋續打。
3.加入已篩粉類，輕輕拌勻。
4.拌入日式紅豆蓉、蜂蜜，輕輕混和。
5.將麵糊倒在餅模內，至八分滿，以攝氏170度焗25分鐘
備註:
我自己覺得日式罐裝紅豆蓉 ,己經很甜,而且仲有蜜糖,所以砂糖份量減了10克.

明蝦角,腐皮卷同鮮蝦菜苗餃

15/8去咗師傅度學點心,不過今日七點半先開始.要攪到成10:00先放學呢
原來明蝦角同腐皮卷都唔算太難.但要炸的.始終都有點怕怕.下次實習的話,只會去媽咪屋企或返學校炸好了
師傅仲俾多咗幾隻我,真開心.可以拎番去俾同事食
同事都話好好味(雖然凍咗同淋咗)如果新鮮食.脆卜卜佢地一定食唔停口啫
而菜苗餃買相冇咁靚.所以唔放出黎獻醜啦! 但都似酒樓那些味道ga!! 好味呢!!