Oreo 芝士蛋糕 (附食譜)

十月份圖書館管理員生日會

今個月好多人生日呀. 要諗幾款生日蛋糕. 有D 味道又怕小朋友唔啱食. 把選擇變得更少了

最後整了這個OREO 芝士餅. 超肥

不過味道是好 ! 好 ! 好!

我唔敢食. 只係甩蛋糕時沾了少許黏在模邊的蛋糕. 已經覺得味道好好了

不過呢個餅好奇怪. 平時的餅碎都放在底. 呢款就底面都有

所以買相唔算好好. 但若你把佢切成一條條的話. 個樣又唔錯. haha

《孟老師的100道小蛋糕》

材料 : (長方形烤模一個)

A. 無鹽牛油    15g    Oreo 餅碎55g

B. 忌廉芝士     150g
    細砂糖          50g
    鮮忌廉          85g
    低筋粉          1茶匙
    蛋黃              1個
    Oreo 餅         20g

做法 :

1. 用鍚紙包好餅模. 將材料A 的無鹽牛油放在室溫軟化, 再加入餅碎內用手混勻,取一半的量直鋪在模型底部,用手攤平並壓緊

2. 材料B 的忌廉芝士在室溫軟化後,加細砂糖用隔水加熱方式,以打蛋器攪拌至忌廉芝士呈無顆粒的光滑狀

3. 加入鮮忌廉,用打蛋器拌勻.

4. 離開熱水,待降溫後分別加入低筋粉及蛋黃, 用打蛋器攪呈均勻的芝士糊

5. 取做法4 的芝士糊約1/2量 用橡皮刮刀刮入蛋糕模內, 將Oreo 餅用手掰成小塊平均鋪在芝士糊上

6. 將剩餘的芝士糊倒入, 再用湯匙把做法1的餅碎平均的鋪在芝士糊表面,最後在面鋪一張鍚紙 (餅碎不易過乾)

7. 烤箱預熱180c後, 烘約30-35分鐘左右

8. 待成品完全降溫後 (雪凍). 較易脫模

青梅雪葩 (附食譜)

呢個雪葩整完出黎. 係超超超酸

酸到有人話覺得胃痛tim (盲人食一杯都應該會開眼)

食譜寫住話要落兩個檸檬. 我諗一個都有多了

而且梅酒是用上自己所浸的. 並唔係係街買啊 !

今年好似用過雪糕機兩三次. 上次番大陸買咗杯整雪糕的書

我要再整多d 先得.

 

《最窩心甜品》

材料 : (4杯分量)

青梅                    5粒
砂糖                    73g
青梅酒                50ml
檸檬汁/檸檬       100g/2個
清水                    250ml

做法 :

1. 砂糖與清水用中火煮至糖完全溶化

2. 青梅去核, 與青梅酒,檸檬汁放入攪拌機攪拌成茸

3. 糖水與青梅茸混合後, 放入雪糕機裡, 存放在冰格,待4小時.  即成

芝士炸蝦丸

陪媽咪去買餸. 佢話今晚炸春卷

我聽到後即刻叮一聲. 炸野.....我又炸

平時係屋企我跟本就唔會肯開油炸野. 但見阿媽係咪都炸春卷. 仲唔拿拿聲搵樣野黎實習下咩

呢樣就係之前學的芝士炸蝦丸

不過我似乎落得多咗蛋白, 因為媽咪屋企冇量匙. 一味靠估

攪到冇之前學時整的咁彈牙. 而且我整得太大粒. 媽咪話我整咁大粒做咩. 好似煎釀三寶咁....

而我老豆仲衰. 食咗兩粒. 先問我呢d 咩黎......而家算點先

我覺得除咗冇咁彈牙. 同埋有d 芝士走咗(包得唔好)外.....

其實都幾好味. 哈哈 !

 

法式小蛋糕 (附食譜)

同事Carmen 話鍾意食Delifrance  的法式小蛋糕

為咗整俾佢食. 我先去買一包試下味. 但.....嘩 !! 24蚊得4粒. 好貴呀 !

返屋企找下食譜. 再找番個蛋糕模出黎.
(個模買咗成年都未用.佢終於可以有用武之地)

比我想像中麻煩. 又要煮. 又要雪.

味道出來我覺得有奶味. 可能係多牛油的原固. 我自己就唔啱食

同事就好滿意. 但味道和Delifrance  的還是有點不一樣.

唔緊要. 我仲有另一個食譜. 等我得閒再試多次俾你食

不過下次唔係生日月.要收錢ga la. 收你3蚊粒啦 !! 哈哈

《輕食小茶餅》

材料 :

麵粉             70g
泡打粉         3g
鹽                 少許
無鹽牛油     75g
雞蛋             1隻 (50g)
砂糖             50g
檸檬汁         5g

做法 :

1. 麵粉和泡打粉混合篩勻.加鹽拌勻

2. 牛油置鍋內, 不斷用木匙攪動, 煮至焦黃色, 離火, 全鍋置於凍水中降溫

3. 蛋、砂糖打起至乳白色, 加入麵粉後用膠刮刀拌勻

4. 加入牛油快手攪勻, 用保鮮紙蓋好, 置於冰箱中冷藏30分鐘至1小時

5. 取出麵糊輕輕攪拌, 倒入唧袋內,(預先將模具掃油) 唧在模具上約8分滿

6. 預熱焗爐200c . 先焗5分鐘, 調低爐火至180c 焗10分鐘

7. 蛋糕出爐, 置於一旁靜待10分鐘, 才退模放在架上冷卻

哈佬 "啤"

10月哈佬喂. 啤梨都來湊熱鬧啊

貓鬼手一隻--招魂中 (黎la ~ ~ 快d黎la ~ ~ )

行近d 睇下係咩妖怪先.

嘩 !! 綠色眼珠ge !!!

貞子啤梨-- 怒啤你中 (佢唔係電視機爬出黎. 而係係洗衣籃度爬出黎. haha)

無無聊聊又一篇. 哈哈

我鍾意啤梨對眼睛. 因為綠得好靚

試過對面屋的妹妹見到啤梨. 問佢爸爸. : 「貓貓隻眼綠色ge ?」

佢爸爸居然答 : 「係呀! 佢係鬼妹黎ga ma」

我係屋入面聽到. 都係個心度 "吓" 咗一聲. haha

我啤梨唔係唐貓. 係鬼貓啊. 呵呵

話梅花鵰醉雞翼 (附食譜)

係9月大食會的時候. 我除咗整雞絲粉皮外. 還整了呢個話梅花鵰醉雞翼

食譜係跟miss jubie  ge. 只係加多咗幾粒話梅落去一齊浸

雖然我都加多咗花鵰酒. 但都係覺得唔夠酒味呢

但個皮就做得幾爽口ga. 加咗話梅．味道又有ｄ酸咪咪．　GOOD !

而且做法容易. 只係要多D 時間去浸啫

材料 :

雞中翼---14-16隻
花雕酒---3 tablespoon （隨意）(我落咗4湯匙)
醉雞汁---1樽

做法　：　

1. 將雞中翼, 洗淨, 抹乾備用

2. 煲一煲水, 水量要蓋過雞中翼, 水滾後放入雞中翼加蓋煮8-10分鐘或至熟（見雞翼D肉縮至露骨）, 撈起用冰凍水喉水過冷河, 令雞翼D肉質收縮及變爽脆, 再用凍滾水浸一浸過走生水

3. 瀝乾後用1樽李錦記醉雞汁+花雕酒及數粒話梅．最少要放入雪櫃下格浸及雪3個鐘 (醉雞汁要浸過雞中翼為準)

4. 將雞中翼撈出，放入碟中排好，最後淋上小量醉雞汁，完成～

美式朱古力曲奇

同事話想食呢款曲奇. 見你係生日月.

好! 就整俾你食

第二次整了. 用番同一個食譜. 但朱古力粒落少咗. (冇咁甜)
但味道一樣咁好. 香濃朱古力味.

俾咗兩塊學生食. 佢居然話d 餅淋咗.

等我話佢唔識野. 呢款曲奇係咁ga . 出面買緊十蚊塊. 要佢俾番廿蚊黎先. haha

食譜 :
http://hk.myblog.yahoo.com/pikpik-pigpig/article?mid=2028

田園蕃薯蛋糕 (附食譜)

開學以後. 圖書館管理員生日會仍然繼續. 呵呵

不過我仍依堅持每次生日會的蛋糕都會不同口味
整咗三年了. 開始有d 唔知整咩好. (有時又唔想太煩la )

今次呢個係蕃薯蛋糕. 食完真係好飽ga .哈哈

但味道都幾得意呢

面頭鋪著的是蛋糕碎. 就算抆忌廉抆得唔靚都冇有怕. 可以遮醜
出來效果還不錯呢

裝飾又係灑粉+ 生果. hehe
個圖案係車厘子黎ga . 大家睇得出嗎 ?

原食譜係用黃蕃薯的. 我特地換了紫心. 等出來個效果靚d

參考《自家製1磅蛋糕》

海綿蛋糕       3片

蕃薯忌廉 :

蕃薯               300g
糖粉               30g
淡忌廉           150g
冧酒               10g

甜忌廉           90g (裝飾用)

做法 :

1. 蕃薯先蒸熟. 壓茸. 然後與其他材料拌勻, 分抹於兩層蛋糕面上.

2. 最後用甜忌廉鋪上整個蛋糕,再加上海綿蛋糕碎作裝飾.

青青世界 ~ 環境篇

原本我地呢個旅程. 應該係有8個人. 不過因為之前一天橫風橫雨. 另外幾位朋友怕危險都不去了

剩下不知死和唔想蝕的我們.  (因為一個月前已俾哂錢.雖然唔貴. $330 兩人包住樹屋及早餐)

幾經艱苦. 終於去到

先去check in. 接待處係一個好普通的房間.而且冇冷氣
但對開的空間卻裝修得很別緻. 可以遠望風景. 又可以抖涼

很多小擺設

之後便拿拿聲上樹屋la. 已經好累的我們.還要行上山
我們住607-608 (最入的兩間耶!! )

我們住宿一晚的樹屋. (屋外有很多昆虫的啊. !! 我見到有蜘蛛.四腳蛇和田雞物體)

內裡不是很大. 佈置簡單. 但都有齊洗手間. 電視和梳化床, 還有個小露台

但梳化床不太舒服就是了. 已經淋哂. 平時去到邊訓到邊的我.今次居然訓得唔好...
一邊睡還可以聽到虫叫和鳥叫. 臨天光叫得最勁. 差點以為電話響

放底行李. 洗過面就去園內餐廳吃飯la

餐廳都是沒冷氣的. 不過可望到這樣的園景. 隔鄰還有一個瓜果園

好似仙景咁. 噴哂煙. haha

除了樹屋之外. 這裡還有木屋. 別墅和酒店
呢座大樓就係酒店la. 雖然住得舒服d . 但冇咁特別law

第二日食早餐時見到的小貓. 很怕人. 還有一隻小bb .不過捐咗去地底了

早餐見到貓貓. 中午見到小狗. 好可愛唷 !! 可以任捽

未行到去接待處時. 步入園內就會見到這條大龍
金光閃閃. 其實係全隻都用CD-ROM 做成ga . 好勁!! 

呢個就係園內ge 設旅展示牌. 因為第一天到達己經太夜了. 我們吃飽飯沖完涼
就一起玩 " 魔力橋 " (因為怕落雨.而帶定去的遊戲)

第二日就會去玩園內設施, 預告係　：　熱死人

青青世界~ 美食篇

話說23-24/8 (冇錯. 係8月呀.但而家先寫)
 9號風球之後我和同事去咗大陸ge 青青世界度玩

但前一晚仲係九號風球. 我地兩個傻婆不斷咁担心冇得去玩. 不斷唔安樂咁msn咗一晚. 又怕下雨. 又怕繼續8號. ....

點知原來個天好鍾意我地.第二朝已經一號風球. 上到大陸只係下咗一陣雨就好天到不得了

簡直曬死人. haha

因為太多相. 一直都好懶去執. 唯有出咗我地呢兩日ge 美食相先la

一去到就要找下我幾年前食過的鼎泰豐.
說實在.幾年前ge 事.我只係記得係東門. 點知都誤打誤撞咁俾我地找到

叫咗陽春麵. 初初以為好齋. 原來都好好味
仲有煎窩貼. 好香口
小籠包分別叫咗普通的和蟹粉的. 吃過蟹粉的小籠包. 你實番唔到轉頭吃普通的
因為好味太多了
而我想價錢應該比香港平. 蟹粉小籠包才48元就有8粒啊

吃這少少的點心. 我和榮榮又點夠飽. 行在東門的行人道上. 個個都會拎住碗酸辣粉
我又係幾年前食過. 決定要再食一次 . 都好好味呀
唔好睇佢紅檔檔. 其實唔係好辣ga 咋

.

幾經艱苦. 我地終於去到青青世界. 因為原本我地應該只係搭15分鐘的士
點知塞車. 變咗搭個幾鐘的士都仲未到. 最後我地要係公路下車.爬欄杆
再不斷問人咁行咗45分鐘先到. 真係餓到呢

雖然咁辛苦. 但都係一個好好的回憶噃!! haha

一放底行李就去園內的餐廳吃飯la
有半隻雞.青青小炒王. 蒜香排骨和娃娃菜.

好好味的揚州炒飯                                        味道ok 的竹筒飯

叫了梅酒來飲. 不過很甜. 我自己浸的好味得多

四個人食. 埋單二百多元. 其實都ok
但當我見到張單. 濕紙巾收錢.紙巾收錢. 連碗筷都收我一蚊時
就真係 "頂....."咗幾聲. 哈哈

第二天的lunch. 我地唔再係園入面食. 而係行番出去類似住宅附近的一間飯館
呢度勁平呀. 個炒飯8蚊咋. 最貴那碟都好似不過12元

味道叫幾好ga. 不過污糟少少就是了

夜晚番出深圳東門. 尋找幾年前食過的豬骨煲
好彩我仲記得街名. 又係咁4個人拎住地圖加上周圍問人. 我地又成功到步la

個煲好似八十幾蚊. 超多豬骨. 抵到爛. 而且好好食

有時返下深圳食野都幾好. 不過始終危險d .所以都幾年冇去過了

今次食番哂. 好正

守望麥田

前排啤梨條頸後面冇端端損咗一大撻. 食咗十日抗生素

而家好番好多la. 塊焦又甩咗. 不過仲差d 毛未生番出黎

唔發脾氣的啤梨. 其實好可愛ga

呢張相係早前影的. 好清楚睇到塊焦甩咗.仲有少少血跡
d 毛仲有好多未生出來. (而家多番少少毛)
唔知會唔會生唔哂呢?
大家覺得似唔似 UFO 那些麥田呢 ? (冇端端有個圈係度. haha )

訓覺照幾張

佢訓緊張座墊. 係上年聖誕同blog 友聚會時抽獎中ga . 睇佢訓得幾舒服

希望佢快D 生番D 毛出黎.
唔係就冇得跟我姓伍. 要姓麥.  = 麥田啤 . 哈哈!!

啤梨 : 影我咁多相. 仲係度笑我?? 作死 ! !

即刻俾個惡樣我睇. 嚇死人 ! !

香橙朱古力半圓球蛋糕 (附食譜)

星期日自己係屋企做呢個蛋糕. 諗住給榮榮一個驚喜

唔知點解每年諗住要俾心機整好d 佢個蛋糕. 但次次都是不滿意的

今年仲有諗過唔整tim. 但都係過唔到自己呢關

最後唔整又整. 和上年一樣都係橙味朱古力蛋糕. 但就唔同食譜

味道ok .但橙味仍未夠.

不懂裝飾的我. 亂咁唧d 白朱古力上去就算. haha = 太空館.

因為啤梨都係9月生日. 所以都諗住一齊切蛋糕la (雖然佢冇得食.但都有張相留念下)

但佢係咁走. 攪到影張相啫. 就好似姦咗佢咁 (所以呢張相個樣都好唔老黎)

入面的蛋糕要分三個不同的size, 我用4吋模和啫喱杯吸出來的.

但可能初初個漿太稀. 第一塊蛋糕又係浮番出黎. 所以每層都要雪一雪先再加第二片蛋糕

《自家製1磅蛋糕》

朱古力海綿蛋糕              3片 (分成三個size)

香橙奶糊:

鮮奶          80g
橙青          1個
蛋黃          2隻
砂糖          15g
橙汁          35g

香橙朱古力慕絲 :

魚膠粉                    7g
水                          45g
(溶)黑朱古力        40g
(溶)牛奶朱古力    30g (但我全部都用哂黑朱古力)
淡忌廉                  200g
君度橙酒              15g

做法 :

1. 香橙奶糊中的鮮奶及橙青煮滾, 蛋黃,砂糖及橙汁拌勻, 加入之前的鮮奶中煮至約80C, 以篩隔起成香橙奶糊。

2. 慕絲中的魚膠粉及水拌勻, 隔熱水座溶後與 溶朱古力, 淡忌廉, 橙酒及香橙奶糊拌勻,將少許慕絲倒於半圓型模內。

3. 加上最細塊的蛋糕, 再加上1/3 香橙朱古力慕絲, 再加中size 蛋糕一片, 將餘下的香橙朱古力慕絲倒上及放上最大的一片朱古力蛋糕, 放雪柜雪至凝固

榮榮生日~美味廚

30/9 榮榮生日. 咁啱今日又出糧.haha

所以今日請榮榮去食餐勁嘅 !!

因為有優惠. 可以用優惠價$699 去呢間美味廚食過二人餐

雖然同我想像一樣.大部份食物都係得兩件. 但都已經食到我地兩個好飽了

而且食物新鮮. 服務又好. 所以覺得都幾抵食

坐底一陣. 就畢咗兩碗蕃茄紅蘿蔔湯俾我地. 佢話係冇味精的. 都幾好味

再來就是俾你自己混醬. 感覺好好玩. (20蚊一位)

之後我地可以選鴛鴦湯底.
一邊係疏乎厘蟹皇蕃茄忌廉湯(上面係蛋白. 湯入面有一隻細蟹)
另一邊係豐粥底.(有去骨雞肉及鮑魚一隻,仲有一碗粥.俾你最後撈黎食)

所有食物都好新鮮. 樣樣野都係爽口的
原隻花彫碎中蝦 (雖然冇酒味. 但黎到d 腳仲郁郁下)

原條生猛海魚 (真係好生猛ga .因為我地食咗兩舊之後發現佢條尾同鰭都仲係度郁緊ga .)攪到我都有d 驚驚地. 佢隻眼仲要望住我tim

原隻新鮮鮑魚 (好彈牙 )

話佢服務好. 係因為會成日過黎幫你換下碟. 又幫你調教個火
仲會幫你"畢"走湯上面的泡泡. 又細心地問你食物啱唔啱. 好抵讚

日本鮮海元貝

日本神戶A4和牛,美國頂級PRIME肉眼,澳洲安格斯和牛,特級日本黑豚肉

全部牛肉都係我食. haha. 正. (因為榮榮唔食牛)
雖然我唔係好識食. 但都覺好味ga .而且個部長仲話牛肉係點日式芝麻醬
不過我都係覺得辣椒豉油好味d

雜錦時令丸子,雜錦時令餃子
(d 丸丸都好好味. 好爽口. 但餃子- 白色那粒唔好味. 皮厚. 個餡又冇咩味. 綠色那款好好多)

時令蔬菜鮮菌拼盤 (幾有田園feel )

日本稻庭手打烏冬 (好滑的啊)

時令甜品係蕃薯湯水.

因為係叫完野食等候期間. 我地掛住傾計. 其實唔覺d 野食好耐都未黎 (我諗廿分鐘到)
但個經理就主動同我地講話唔好意思.要我地等咁耐. 所以送咗兩杯酸梅湯俾我地
而且佢d 食物冇味精. 所以唔會好口渴. 我地只係飲咗佢杯酸梅湯 同 茶
就唔需要叫其他飲品了

係食野之前影的合照. 費事食完成枱污糟邋遢. hehe

我上網見到人地話你一坐底就會俾碟酸彊皮旦俾你 .成廿幾蚊
但我地就冇. 唔知係咪我訂枱時已經話要呢個餐. 所以唔駛俾呢 ?

最後埋單. 真係$699 . 佢冇收加一. 冇計茶錢@$9 和醬料錢.  呢層我真係冇諗過
我仲預咗要$800 埋單. 所以覺得好抵. haha