香蕉全麥蛋糕 (附食譜)

又一做給同事的生日蛋糕 (差不多大部份同事生日我都會做蛋糕送給他們的)

 

因為我鍾意試整新的蛋糕口味. 好多時都係第一次整 (等我有多d 機會玩)

所以感謝個個同事次次都樂意做我的白老鼠. 鍚哂你地
(好彩咁耐都冇試過肚痛事件)

今次個蛋糕唔係好甜. 基本上係得d 蕉味甜. 口感似食麵包多d

香蕉加全麥粉, 感覺幾健康

雖然樣子不算漂亮. 但都希望壽星女鍾意

《日嚐甜品》

準備一個 3 吋x 7 吋長方形蛋糕模,並掃上一層菜油 (我用牛油紙鋪底)

先要將焗爐用180度預熱15分鐘

材料 :

無鹽牛油                    70 克
黃糖                            30 克
雞蛋                            80 克
全麥粉                        90 克
麵粉                            90 克
泡打粉                        1 湯匙
梳打粉                        1 茶匙
熟香蕉茸                    200 克

面層 :

香蕉                            2 條
砂糖                           少許
肉桂粉                       少許

 做法 :

 1.用電動打蛋器以中速將無鹽牛油打至軟身.

 2.然後分數次將黃糖加入繼續打勻. 

 3.    加入已打拂打的雞蛋,並以低速打勻. 

 4.    用攪拌機把香蕉攪爛成茸,之後倒入混合物中,以低速打勻.

 5.    篩入全麥粉,麵粉,泡打粉,梳打粉,然後用膠刮拌勻.

 6.將混合物倒入蛋糕模內,用膠刮?平表面.  在面層加上香蕉片.

 7.    將混合左砂糖和肉桂粉撒在香蕉面上,以180度焗45分鐘.

廣州探親

三月 8-10 號. 我陪咗榮榮返去廣州探佢婆婆.

而我又可當去廣州睇下玩下.  平時自己都係跟D 2天團去下旅遊景點多

今次就係悠閒咁周圍逛下

係佢婆婆屋企樓下. 有個青少年園地！！

但其實只係得D 石椅係度咋MA, 十足十平時香港Ｄ　阿伯捉棋地方

真係唔知邊忽青少年　？？？

由於今次的目的係探親．　所以我地好多時都只係係附近逛逛．　
冇話去Ｄ咩特別地方

但有Ｄ　建築都幾靚．　係上下九街附近．　感覺仲好似台灣

 

呢Ｄ冇軌電車，　其實坐落都幾似巴士．感覺分別不大, 但我以前未見過

呢三日都早睡早起．　十一點上床．八點就起身．　好似一日多咗好多時間咁

呢朝我地去咗飲茶．　河的對面就係白天鵝賓館．

不過空氣真係好差．　勁矇

相比起我想像中. 其實廣州很乾淨. 唔會有好多垃圾係街.
分分鐘乾淨過香港

呢條河．．．．勁污糟．　但都有人游水．　真係勇敢

係河邊見到佢對皮鞋．　勁想扔落水呀．　哈哈

係廣州．　好似周圍都好多呢Ｄ　銅像．　好多本地人都一樣會同佢地影相
我見過咁多個．　只係對呢個銅像有興趣．　

好好身材呀！！　

其中一天的晚餐出街食．　原本好想影相．但係佢Ｄ　親人係度
個感覺怪怪的．　所以都係收埋部相機啦

但呢碟野．．．忍不住要影

炸蠶蛹....我還是沒有勇氣去食．　榮榮試咗．．佢話食時唔好諗咁多就得ＬＡ

而今次第一次見佢婆婆．　感覺佢真係一個好可愛的老人家．打牌時又會手指指叫人小心Ｄ（佢就食糊），　又為食喎．麥當當同零食．　佢都想食

 

希望佢婆婆身體健康．開開心心

亦多謝榮榮Ｄ　姨姨三天來的照顧

叉燒醬焗雞翼 (附食譜)

呢個雞翼都幾好味呀 !

又簡單. 輕輕鬆鬆醃15分鐘. 扔入焗爐焗20分鐘. 跟住食得

啱哂我呢d 手腳慢嘅人.

好耐冇自已煮過雞翼了. 覺得好好味. 哈哈!! 

《百變雞翼cook 得起》

材料 :

雞中翼            8隻
蜜糖                1湯匙

醃料 :

蒜茸              2茶匙
叉燒醬          4湯匙 (不過我落咗3湯匙就夠)
胡椒粉          少許
鹽                  半茶匙

做法 :

1. 先將雞中翼洗淨, ?乾, 以醃料拌勻醃約15分鐘。

2. 將雞中翼置於鋪上鍚紙焗盤上, 放入己預熱至180c 焗爐,
    再以相同溫度焗15分鐘後,再反轉焗5分鐘,兩面掃上蜜糖,再焗1分鐘, 即成

愛吃雞翼的我 .原來都整過幾款口味.
回顧下先

香辣雞翼 (附食譜) , 檸檬焗雞翼 (附食譜) , 橙香芥辣雞翼 (附食譜) ,

香草咖喱雞翼 (附食譜), 蒜茸黑椒雞翼 (附食譜), 蜜糖燒雞翼 (附食譜)

日式扇貝扁意粉 (附食譜)

8周年除咗出街食. 其實自已都有煮d 野食當慶祝ga

雖然簡簡單單. 但都係我落足心機的

晚餐只係意粉和雞翼. 但都吃得飽飽了

我最愛的意粉. 咩類型我都鍾意. 螺絲粉. 蝴蝶粉. 闊條麵......總之係意粉類都冇放過

呢個意粉用咗味醂. 以前一直都唔知係咩黎. 後來先知係酒類

剛好之前在city super買到. 見到呢個食譜有用. 便決定一試

但食落d 味其實又唔係好特別咋喎. haha

《意粉cook起》    1-2人份. (但我都煮多咗d .但湯就唔駛煮多)

材料 :

扁意粉            200g
扇貝                3隻
靈芝菇            30g (買唔到, 用了金菇代替)
黑胡椒            少許
薑茸                半茶匙

日式湯式材料 :

日本醬油          1茶匙. (我用咗點壽司那些就算)
味淋酒              2湯匙 (在city super有得買)
海鮮素              1茶匙 (百佳有售. 要廿幾蚊. 好貴...入面有三包. 邊個要可出讓.haha)
水                      500ml

做法 :

1. 扁意粉烚熟, 撈起過冷河, 瀝乾水份, 備用

2. 扇貝去腸, 洗淨備用 (仲要用少少鹽和胡椒粉稍醃)

3. 下500ml 水, 將日本醬油混和味淋酒煲滾後, 下海鮮素, 略滾約1分鐘
    成日式湯底, 防湯底變焦

4. 下1 湯匙油燒熱平底鑊, 爆香薑茸、黑椒碎, 再下扇貝略炒;下200-250ml 日式湯底,
     煮至微滾, 再下金菇煮至菇身略軟,加入意粉兜炒, 再下少少鹽調味

5. 若扁意粉太乾身, 可再下少許日式湯同炒, 若嫌味道不夠濃, 可再下適量海鮮素, 
    兜炒即成

 

懷舊紅豆糕

又一實習功課 .學完後第一次整.(也許是最後一次)

執相的時候. 先發現自己唔記得咗寫呢個紅豆糕

個紅豆糕係過年時. 同朋友一齊整年糕時整GA

不過上次係怪師傅度聽到佢話 呢隻紅豆沙已經冇得賣了 .如果想再整. 便要自已去超市找代替品. 但唔知有邊隻係類似質地ge 呢??

而呢一罐我買咗好耐ga la. 不過一路都冇整. 再擺我怕會過期啊!!

所以拿拿聲整埋佢. 唔想浪費

呢個糕可以凍食又可以煎黎食. 係用馬蹄粉整的. 素食者都啱

 

復活節提子餅乾~ 舊作 (附食譜)

見就黎復活節.post 個餅乾應下景先. (不過其實係06年整的了. haha)
特地等一年呢個節日先出blog . 哈哈

但其實我都唔知個餅同復活節有咩關係!不過個食譜係咁寫law.

最重要係好好味啦! 勁脆呀 !

以前成日都好奇怪點解復活節有時係3月有時係4月

又唔係計舊曆. 點解會咁ge . 呢度有解釋喎!

" Easter" 復活一字來自希伯來文" pesah" , 古時基督教廷會在不同時段慶祝復活節

直至公元325年, 才被當尼西亞會議定為3月21日後第一個月圓後的星期日。

今日的基督教國家, 復活節是紀念上帝之子耶穌復活的日子

《妙趣曲奇》

材料 :                   可做12-16個

牛油                      100g
糖                          75g
蛋黃                      1隻
麵粉                      200g
肉桂粉                  半茶匙
黑加侖子乾          75g

餅面 :

蛋白                      1隻
糖                          1-2湯匙

做法 :

1. 焗爐預熱190c, 餅盤塗油

2. 牛油與糖打至軟身, 加入蛋拌勻

3. 把麵粉篩入牛油混合物內

4. 加入黑加侖子乾, 搓成麵團, 置己灑上麵粉的工作枱上, 碾成半厘米厚

5. 利用曲奇餅模印出12-16個曲奇餅, 放在焗盤上焗10分鐘

6. 蛋白打勻, 取出餅乾, 掃上蛋白

7. 餅面灑糖, 回置焗爐焗5分鐘至金黃

香蒜曲奇 (附食譜)

想整呢個曲奇好耐. 因為好鍾意食蒜頭味ge 野

不過平時唔太愛整曲奇. 所以一路拖. 冇整到

呢次湊住阿b 的周未.我居然可襯佢訓午覺的時間

整了一款小蛋糕加呢個曲奇. (haha . 覺得自己好叻!!)

阿B 訓醒就有茶點食LA. 佢仲好捧場. 每樣野都食幾件. 仲想偷食tim .

當佢同我講. (指住d 餅) : " 表姐. 我想要" 

真係覺得好滿足

呢個餅好香蒜茸味. 用得不算太多牛油. 感覺唔膩. 而且仲勁脆.

加上個曲奇模新玩具. 每個都好似俾人咬咗一啖咁. 好可愛

《日式曲奇》      25-30塊

材料 :

牛油                60g
糖粉                35g
蛋黃                半隻
蒜茸                2湯匙
生油                10g
低筋麵粉        75g
高筋麵粉        50g
梳打粉            1/4茶匙

做法 :

1. 蒜頭切碎後用生油拌勻, 備用 (因蒜頭才不會變黃)

2. 牛油放在室溫中至軟化, 與糖粉打至鬆軟變白, 加入蛋黃拌勻, 再加入蒜茸攪勻

3. 把低筋粉、高筋粉、梳打粉篩勻, 拌入(2)中, 搓成粉糰

4. 放在牛油紙上, 用麵棍碾0.5厘米厚, 放入冰箱雪30分鐘至硬身

5. 取出鈒出花型, 用叉在餅面上刺上小孔 (我冇咁做),
    放在己墊牛油紙的焗盤上, 用170c 焗15-20分鐘

榛子雲石芝士蛋糕 (附食譜)

呢個蛋糕係整俾一個主任. 佢以前係我上司

所以由我學識整蛋糕以來. 我每年都會整個比佢做生日禮物

今次呢個我都覺得幾好味. 但朱古力和榛子味都不突出

不過焗完之後個面爆咗. 唯有用d甜忌廉同士多啤梨遮住佢

但出黎效果都唔差呀! hehe

《甜心美點》        6吋

材料 :

餅底碎                    40g
榛子粉                    30g
無鹽牛油(熱溶)      30g

餡料 :

忌廉芝士                 250g
幼砂糖                     60g
粟粉                        10g
鮮奶                         60ml
雞蛋                         1 1/2 個
無鹽牛油(熱溶)      20g
黑朱古力(座溶)      50g
無糖榛子醬             20g

做法 :

1. 焗爐預熱至170c 約15分鐘

2. 餅底: 餅乾碎與牛油溶液及榛子粉拌勻, 加入餅模內壓平。

3. 忌廉芝士及幼砂糖打至滑, 粟粉及鮮奶拌勻後分次加入。

4. 分次加入雞蛋, 再下牛油溶液拌勻。

5. (座溶朱古力時. 可加榛子醬一齊拌勻。)

6. 把半份芝士糊倒進焗盤中,餘下的芝士糊與朱古力溶液及榛子醬拌勻,
   倒進焗盤,隨意勾畫出雲石圖案, 焗約45分鐘,關掉及打開焗爐, 讓芝士餅待涼後取 
   出,可以甜忌廉裝飾. 即可享用

同blog 加映之前做給媽媽生日的藍莓芝士蛋糕
做過很多次. 不過今次加了餅底 和用朱古力做的生日牌

 

以前做過的藍莓芝士蛋糕

藍莓芝士蛋糕 (附食譜) ~舊作

OREO曲奇芝士餅

 

朱古力梳乎厘 (附食譜)

交功課時間. 但半失敗咗.....(給自己一隻豬. 其他人冇交功課. 給兩隻大黑豬. )

半失敗係因為佢都識漲起. 口感都算似. 但就淡而冇味

好明顯蛋白打得過硬, 攪到表面不平滑

個食譜話必須要用Valrhona 可可粉及蒙牛奶, 我冇跟到可可粉牌子. 諗住試咗先. 唔通就係咁冇味 ??

但甜都唔甜下喎!  真奇怪

呢個甜品真係沉得好快. 我一出爐就即影相. 一路影就睇住佢一路沉

有冇人跟呢個食譜整過. 點解會咁淡. 係咪我做錯d 咩呢??

啍 !! 我會再嘗試的

佢寫住此朱古力梳乎厘必須要用Valrhona 可可粉，還要用蒙牛奶否則會很失色

材料：4 杯 (8 cm)

 

蛋黃             2隻
砂糖             40g
可可粉         15g
低筋麵粉     10g
全脂牛奶     150ml
牛油             20g
蛋白             3隻

 

做法 :

1. 
   

   預熱焗爐 200C。
   

   
   
2. 
   

   將蛋黃、牛奶 (50毫升)、砂糖 2 0 克、可可粉、低筋麵粉順序加入單柄煲內煮至稠。
   

   
   
3. 
   

   然後加入餘下的牛奶攪勻 (如果出現粒粒狀，必須過篩，使朱古力糊變得滑滑溜溜)。 (但好杰的. 都唔知點隔篩)
   
   

   
   
4. 
   

   加入牛油以慢火煮溶。
   

   
   
5. 
   

   另外，準備一個乾淨大碗，將蛋白打至起泡，再加入 20 克砂糖打至企身。
   

   
   
6. 
   

   蛋白加入朱古力糊中拌勻，倒入梳乎厘杯，入爐約 20分鐘，即成。

麻甩B 近況

好耐冇寫過阿B

因為過年時佢玩較剪. 自已剪咗幾執頭髮, 變咗 " 辣呢B" 所以一直都冇同佢影相

雖然佢有一大班FANS . 和我呢個表姐鍚

但可惜他的父母都有問題. 比較不著緊. 這年多兩年來. 大部份時間都係靠我七十多歲的婆婆湊

可以想像到七十幾歲老人家 V.S 二歲幾小魔怪

真係精力耗盡

呢幾個月. 經過我和媽媽落力去找社工

終於可以讓阿B 去寄養家庭暫住, 讓我婆婆可休息一下 (原本係去類似兒童之家的中心. 好彩最後都找到寄養家庭的位)

但一切都只係暫時. (約兩個月)

去向還是要睇阿B媽咪 (即我舅母)的穩定情況. 先再作決定

不過. 我放假還是可以湊阿B 去玩的

呢張相係過年前影的

那時好凍. 阿婆同佢沖涼. 怕佢凍親. 所以放佢入個桶度沖. 好好笑!

 

 

 

 

相愛8年~Big Bite

謝謝你送給我的8周年禮物

小丸子~愉快的一天

今年我們的慶祝晚餐決定放棄浪漫. 換上見到都開心的Burger

上個月睇報紙見到個漢堡有10吋高. 實在忍不住要去試試 ~ Big Bite (位於北角)
(我係報紙度過.我個口最大只係去到第一塊牛肉)

http://www.openrice.com/restaurant/sr2.htm?shopid=21300

當然. 真的包並沒那麼高. 可能用紙包住了吧. 但都有5-6吋的 (我要分開兩層食)
口感豐富

Fat Bastard ~ $84

個包好似我塊面咁長. 食完真係飽到嘔

還試了Poutine -芝士薯條. 不過我唔覺有芝士味. 味道反而似細個吃的保衛爾牛肉汁
還有榮榮吃的bbq chicken漢堡

在回程的路上, 見到好多人排隊
我地唔執輸又排埋一份. haha.  原來係雞蛋仔.
佢仲有碗仔翅.都有人排隊的. 不過我地住咁遠. 好難外賣

不過真係好好味. 外脆內軟.唔掛得咁多人排la

好愉快的一天. 希望下個周年我地繼續周圍去 

 

摺埋+ 就跌

見到 blog 友隻肥頭摺埋訓... 就諗起豆豆都鍾意咁訓 (慳位訓法)

像yoga 的招式

豆豆 : 攪咩又影我. 阻住我訓覺. 咁鍾意影, 你睇下我隔離隻野先la. 佢就真係唔知想訓成點la . (下圖豆豆的眼神. 是斜視又輕蔑)

究竟隔離隻野訓成點 ????

就跌落床la

仲訓得鬼死咁"冧"

豆豆 : 快d 跌落去啦你!! 等我霸哂. 唔駛摺埋. 呵呵

 

玫瑰咸蛋 (附食譜)

呢個咸蛋係1月1日醃ga. 醃咗20日. 但都失敗咗

所以一直都懶得寫番出黎

我想我失敗的原因係因為d 鹽水沒有完全蓋住雞蛋.
我問過人. 佢地話應該用野責住佢(因為鹽水.所以d蛋會浮)
或者係我個器皿唔啱身la

打開黎睇. 見到個蛋王仲咁扁. 我就知唔得ga la. 不過都照蒸咗黎食

個蛋白就好咸咸地 .好似灑咗d 鹽咁. 但個王就一d 咸味都冇

放心. 雖然放咗玫瑰花一齊醃. 但就少少味都食唔到. 唔駛怕會好怪

(當晚. 麻甩B 就好鍾意食law. 可能咸咸地卦)

我仲特地用呢隻靚蛋黎醃GA. 點知失敗咗

呢隻蛋要$2.x 一隻的. 貴.....

或許有機會, 會再醃多次ge

 

《三餐》

材料:

鮮雞蛋                      3隻
鹽                              200g
水                              300ml
乾玫瑰花                  2g

工具 :

密實樽

做法:

1. 雞蛋抺乾淨備用

2. 水煮至大滾, 加鹽攪勻成高濃度鹽水, 略為置涼

3. 置雞蛋於鹽水中,加玫瑰花, 存於密實樽裡浸15-20日

4. 打蛋於碟上,隔水蒸2-3分鐘即可

tips :
浸夠時間後的咸蛋要取出, 不可長時間浸在鹽水裡, 否則會過咸

繼續一齊玩

繼續玩一月一聚. 玩甜點

又來實習功課. 高力豆沙. 又係學完冇整過

係群眾壓力之下.我真係幾緊張. (唔係佢地會嘈死我ga. )

不過係珍妮仔同ivy 幫我炸之下. 成品順利出世.

樣子和味道都好吸引.

因為還有豆沙剩下. 即興包起湯丸. 一些用豆沙. 一些用片糖

片糖那些味道好懷舊. 好久沒吃過這個味道了

每人兩三粒. 剛剛好. 而且原來自己搓的湯丸. 口感Q 得多

最後是簡易蘋果批, 上次都整過了. 很好吃. 不過我地今次偷懶用鍚紙杯

我覺得個皮的口感差咗. 原來呢D 野不能偷懶.

 

下次約會的餐單已經想好. 不過我還未做功課. (但其他人應該都未. haha)

一齊玩

一齊玩!! 玩咩??

我除咗玩貓之外......咪就係玩整野食law

今次約咗珍妮仔.小魚仔,ivy 同irene 一齊玩一月一聚

玩咗五款野 (好叻呀!! )

今次先出咸香脆口的 腐皮卷和咸水角

腐皮卷d 餡係隨意的. 有甘筍絲. 木耳. 榨菜. 肉絲等等.

炒香佢就可以包, 包好就可以炸, 炸好就可以食........勁好味呀!!

製作圖偷自小魚仔. haha. 唔駛整

還有咸水角. 呢個係我係學完之後都未整過ga

又多咗一項實習功課的機會呢!!

不過我地包得不太靚呢. 但冇損味道

我拎番去俾媽咪食時. 媽咪話個樣唔似咸水角.(話我包得肉酸) 話係似d 雞子被人炸咗咁樣

炸雞子....好核突呀!! 不過笑死我了

甘筍忌廉湯 (附食譜)

這個湯可以話係榮榮煮俾我飲的

由於怕情人節當天整唔切.所以前一晚已經有所準備

D 甘筍要切粒.....五條中我切咗三條. 榮榮沖完涼出黎見我仲未切完就幫我切咗兩條

第二日情人節佢放假. 我返工. 所以就拜托佢負責整呢個湯

我放底食譜. 佢只係打電話問咗我一次大概.

我放工番屋企時佢就己經整好可以飲la.

佢成日都話有一次會煮飯俾我食. 今次都叫做有個開始la

下次你要煮哂成餐飯呀. 知冇??

不過唔知係咪我d 甘筍太大條呢?? 個湯出黎......好多渣. 雖然好細. 但每一啖都唔似飲緊忌廉湯. 因為一d 都唔滑. 每啖都有渣.....

但味道都ok ...又有甘筍味......只係口感比較奇怪

 

《Lisa 雜誌》                4位用

材料 :

澳洲甘筍                       5條
洋蔥                               1個
雞湯 /菜湯                     400ml
忌廉                               50ml
牛油                               1湯匙

做法 :

1. 甘筍、洋蔥, 去皮, 切粒, 備用

2.以牛油起鑊, 下洋蔥粒, 慢火煮至透明, 加入甘筍粒,煮至腍後,倒進雞湯, 煮滾

3.將湯料倒進攪拌機內, 加入忌廉同攪拌至濃稠,倒出, 便成

tips: 宜選用澳洲甘筍, 味道會較鮮甜, 不用下調味料也很美味