豆沙梘水粽

兩年前係家政坊學過,今年終於襯星期日得閒"的"起心肝來一次實習

朝早起身浸米, 米要浸2-4小時.
粽葉要淥10分鐘.再用毛巾抺乾淨. 剪頭剪尾
之後米加調味攪勻.豆沙搓成圓形或條狀.(預備材料工作就完成)

包的時候,可能我想包得靚d,所以又拆又包咁.一隻就可能用咗成15分鐘
同埋d葉又好快乾哂.攪到又要浸多次.如果唔係塊葉太脆,又會爛.咁又包唔到的了

不經不覺咁整咗成個下午.已經好累.原想打電話問下媽咪可否用電飯煲來烚粽
點知佢就話我唔叫埋佢一齊包粽 (但我明明記得佢唔識包)
之後,佢都過咗我屋企

一入屋,佢就拿起塊葉包包包.仲話我咁咁咁. (又話咁大個女都未包過,原來咁好玩...)
於是我問佢你唔係唔識包的嗎?  接著佢話今朝睇有線阿蘇學的
之後上為食貓俾咗包一葉粽段短片佢睇.佢又係咁係到包一葉粽.包咗幾十隻.仲老點咗我去洗葉添!!

記得miss話過梘水粽要包得手鬆.而咸肉粽就要實 ,我都有提過媽咪ga.但佢似乎太興奮,唔記得咗了
隻隻都扎到凹咗咁滯.唉!!!

大隻粽是我包的.味道都唔錯ga (其實都唔係好大隻ga咋)
迷你粽是媽咪包的,雖然材料一樣.但就因為太實.口感唔同.仲有一些糯米攝咗入豆沙度.所以會有少少唔熟

份量 : 1斤米/ 1湯匙梘水/ 3湯匙油

米先洗後浸.晾乾. 再下梘水撈勻

烚1小時

最麻煩就係d粽葉.有冇人可以俾d貼士我呀!!