話梅雞翼 (附食譜)

講番之前開大食會. 我除咗拎蛋糕去. 仲整咗雞翼

因為每個同學都拎一樣食物去. 但可能佢地細個la. 個個都係整甜點

有芒果班戟. 芒果布甸. 芝士蛋糕同菠蘿腸

MISS TSE 就整意粉. 咁我咪都整D 咸野去食law

唔係就變咗甜品buffet la . haha

呢個雞翼聽落雖然有點奇怪, 但個味道酸酸甜甜. 都幾唔錯ga!

榮榮睇到張相. 都話覺得好好味咁. 仲怪我唔留d 俾佢試下呢!

同事屋企還有一隻貓貓. 不過可能太多人圍住佢.

所以有點惡呢. 不過都係輕力咬下人啫. 冇咩殺傷力. (同我啤梨真係冇得比呀)

牠叫 「小心」, 唔知係咪要小心佢會咬我呢!

《百變雞翼cook 得起》

材料 :

雞全翼           6隻 (我用咗22隻細的雞中翼)
話梅               7粒
乾蔥(切碎)     2粒 (我冇落)
蔥(切段)         1棵 (我都冇落)

醃料 :

薑茸               1茶匙
鹽                   半茶匙
紹興酒           1湯匙
胡椒粉           少許
生粉               半茶匙

調味 :

片糖               半塊(敲碎)
老抽               半湯匙
水                   半杯
生抽               1茶匙

做法 :

1. 先將雞翼洗淨, 斬件, 抺乾, 加入醃料拌勻醃30分鐘, 備用

2. 燒熱1湯匙油, 爆香乾蔥碎, 下雞翼煎至金黃

3. 加入話梅及調味料拌勻, 加蓋, 以慢火煮至汁料略稠, 下蔥段,即成

plum sauce chicken wings

Da.....B

早幾天. 替花珠和皇子添一起買了現時瘋摩貓界的玩具 ~ da bird

皇子同花珠都玩得好開心. 仲好快出到blog

原本我都想出. 可惜呢幾日男友都返工. 我實在好難一手拎住da bird .另一手又拎到相機

貓貓動作又快. 實在很難影. 唯有等男友放假先可以影到啤梨了.
(豆豆冇咩反應. 只係出手打兩野. 連patpat 離地都冇......)

上星期麻甩B 又回來渡假

原來da bird . 小朋友都啱玩啊!!

笑得咁開心ge ?

我又要捉!!

企埋起身.... 唔驚跌?

都幾清楚睇到da bird ga .
唔知小朋友可唔可以參加埋da bird 的攝影比賽.?  haha

其實都有同啤梨玩ga . 難得的一張
啤梨出手. 幾大動作.

還有一段片. 係麻甩B 撩緊啤梨玩
因為啤梨係一隻要" 捕" 好耐的貓貓. 阿B 就話佢喱埋一邊. 唔玩GE (你地應該聽唔清楚佢講咩, 呢個係佢GE 意思)

原本我有諗過唔放段片出黎. 因為片中的我好惡咁叫阿B 唔好整爛個玩具.
(俾你地聽到我咁惡的一面, 雖然平時我都好惡. )
隻da bird 成80蚊ga ma...爛咗好肉赤ga .haha

柚子茶芝士餅 (附食譜)

這個蛋糕是送給我的圖書館主任的呀!!

那天拎著這個蛋糕和雞翼去了她家和數個同學開大食會

雖然是少少的食物. 卻吃得我們很飽了

之後的遊戲又是不斷用身體去表達. 真係好似做運動咁呢!! (玩到傻咗)

雖然已經過了好多天. 但還是祝妳生日快樂. 開開心心

和同學們的合照 , 話咁快佢地就已經中五了 (枱面的全是甜點啊)

《清怡甜點》 6吋份量

餅底:

消化餅         150g
溶牛油         60g

芝士餡:

忌廉芝士      250g
糖                  3湯匙
檸檬汁          1湯匙
魚膠粉          1湯匙
水                  3湯匙
鮮奶              60ml
甜忌廉          3/4杯
柚子茶          3湯匙

餅面:

已打起甜忌廉少許
柚子茶          2湯匙
魚膠粉          1茶匙
水                  2茶匙

做法 :

1. 消化餅壓碎, 拌入溶化牛油, 倒入已墊牛油紙的烤盤內,  壓實

2. 甜忌廉打起; 魚膠粉與水同座於熱水中拌勻至魚膠粉完全溶化

3. 忌廉芝士打滑, 加入糖, 再打片刻, 再加鮮奶, 調勻

4. 逐少加入檸檬汁, 柚子茶及做法(2)的魚膠粉水, 打勻

5. 拌入甜忌廉, 傾入餅底上, 倒入雪柜冷藏約4小時至凝固

6. 餅面料中的魚膠粉與水座於熱水中, 調勻, 再拌入柚子茶, 舀在餅面中央, 擠上甜忌廉, 再將芝士餅放回雪柜中冷藏片刻即成

TIPS : 柚子茶內的柚皮可以略剪碎, 避免切餅時把餅切爛

Pomelo Tea Cheesecake

第四堂~ 唔啱食

21/5 第四堂 : 南瓜包, 紐紋杏仁條, 忌廉吉士包

除咗南瓜包外. 另外兩款都用了同一樣的吉士醬. 超大奶味. 唔啱我食
所以全部俾哂榮榮

呢個咁大的麵糰是我搓的. 分別做成吉士忌廉包和杏仁條

發酵後好似pat pat . 勁想畫條T-back 俾佢

杏仁條好大工程. 又摺又推又要搽醬. 變到好大塊

呢個工具好似好好玩咁. 可以同一時間"界" 開幾條

之後再分開幾折. 扭一扭. 鋪上杏仁.就入得爐了

 

出爐個樣唔算好靚. 搣了少少來吃. 但就勁鬆軟

另外的忌廉吉士包, 就要先煮好個醬. 再包餡

外型沒什麼特別. 和上次的吞拿魚包一樣

但我見另一位blog 友的包包會有另一些做型. 好可愛的 (南瓜包是南瓜型狀啊)

南瓜包. sweetcat 搓. 搓的時候好香南瓜味.  不過食的時候就不覺得了

阿sir 話南瓜多纖維. 所以呢個包是有難度的

又是方包做型, 呢個包成為第二日的早餐

我們三個做的包包合照

呢堂講咗話可以優先報讀中班.

但我想自己應該不會再報了. 因為我都只係想整些軟身包包. 得閒做下早餐咁

我想上完呢十堂. 一般的應該都ok

唯有靠自己跟書整. 再多多練習吧!

刀疤碧的由來 (附食譜)

呢碟野就買咗30蚊排骨la. 覺得都幾貴

不過唔係成日煮就算數la. 都係諗住玩下啫

原本佢話要炸熟d 排骨. 但我就用半煎炸. 諗住唔駛咁多油

點知熄火後論盡. 居然隻手" 辣"咗去過鑊邊

初初都只係紅咗. 隔咗幾個鐘就出現疤痕

第二日都冇事ge. 摸佢都唔痛.我仲係到玩.

點知再過一天水泡穿咗就覺得痛了. 要用紗布遮住

仲要唔知點解個傷痕" 辣 " 到好似刀疤咁

所以改名 「刀疤碧」. haha. (我講俾媽咪聽時. 佢差點噴湯呀. )

不過呢張相己經係幾日後先影. 好咗好多ga la.

不過唔知係咪自己燜得耐咗D.定係我偷懶冇將d 檸檬皮用熱水浸
 攪到有少少苦

 

香檸燜排骨

材料：

腩排                      12兩
檸檬                      1-2隻

醃料：

生抽                      1湯匙
鹽                          1/4茶匙
胡椒粉、酒          各少許

調味料:

蜜糖                       3湯匙
鹽                           1/4茶匙
糖                           1 1/2茶匙
檸檬汁                   1/3杯
水                           1/4杯

做法：

1.      洗淨腩排，斬成二吋餘長段，放入醃料拌勻，約醃一小時。

2.      將上項材料放入熱油中略炸至外呈金黃色，撈起，瀝去油分，待用。

3.      將一個檸檬皮切絲，用熱水略泡，瀝去水分，待用。檸檬肉榨汁約1/3杯。

4.      將調味料放入鑊中用慢火煮至滾起，放入腩排、檸檬絲煮至汁濃及收乾、排骨熟，即可上碟供食。

Tips

檸檬肉可切塊加入同燜。

蠔汁焗雞中翼 (附食譜)

雞翼是我的最愛. 又方便又好味. 又多煮法

屋企冰箱一定會長期有包雞翼係度. 食哂就會補充

呢個雞翼又唔駛其他配料. 調味都係基本野

所以成餐飯.連埋昨天post 的炒薯仔. 就只係用咗17蚊

仲可以帶飯. 好抵. yeah!!

材料：

雞中翼1磅、薑6片、蒜頭2粒、葱花少許。

調味：

紹興酒2湯匙、蠔油2湯匙、片糖1/3片、水適量、生抽1茶匙、鹽適量。

做法：

1. 用鹽醃好雞翼；將蠔油、紹興酒、水、片糖、生抽放在碗中，撈勻成調味料，備用。

2. 在鍋中爆香薑片、蒜頭，放入雞翼，然後加入調味料；加蓋，轉中火焗5分鐘後，上碟並灑葱花，即成。

芥茉洋葱炒薯仔 (附食譜)

今個月都有D 時間玩下煮飯仔

不過有時間. 我都係慢手慢腳 .成餐飯用咗最多時間係切薯仔. haha

原本諗住刨的. 但太細太幼. 怕炒完出黎會冇哂.

所以用刀切番一條條. 識我ge 人都知我切野有幾"快" . 所以放假都係8點先開到飯
(已經俾平時早咗半個鐘)

落咗芥辣去炒. 但都食唔出味ge .
我諗唔想特地買支野番屋企的. 應該唔落芥辣都冇所謂

呢碟野就用咗17蚊. (10蚊肉碎. 7蚊薯仔洋蔥)

材料：

中薯仔                             1個
大洋葱                             1/4個
免治肉(任何肉類均可)  30克
黑椒適量、鹽                 適量
英式芥茉                         2茶匙(或隨個人喜好)
鮮奶/忌廉                        2湯匙(亦可省)

做法：

1. 薯仔去皮刨粗絲，洋葱切碎，肉用少許豉油、糖、生粉先調味；薯仔絲灼熟，備用。

2. 用少許油起鑊，炒香免治肉和洋葱碎，再加入薯仔絲和黑椒、鹽調味；如果感覺炒得太乾，可在此時加入鮮奶/忌廉，再拌入英式芥茉炒勻即可。

貼士：想吃得較有口感，可把薯仔切小粒而不刨絲。

中班課程

14/5 上了第三堂麵包課. 原本應該想提子麥包. 栗米牛肉包和士的包

點知阿sir 改了課程變咗橙味麵包和燕麥麵包 (我原本仲好期待個牛肉包可做早餐)

同時話最後一堂的裝飾包(即係冇餡. 只係得個可愛做型)會冇咗. 即變咗呢堂ge 野

而原本第三堂的課程就會係最後先教番

我都冇所謂ge .反正裝飾包感覺都只係玩麵粉. 學多隻味對我黎講仲好

但後來我上工聯會個網發現其實呢堂係中班課程. 但個阿sir 仲話個橙味包係佢新發明的口味! 真係O哂嘴!!

今次我負責搓燕麥包. sweetcat 負責搓橙包. 之後我地兩份分

但個燕麥包勁難搓. 搓咗好耐都係乾爭爭咁. 真係要出多d 力.

好不容易叫搓好了. (正中間那個是我的)

發酵後做型. 大家都覺得似蘿蔔

再發酵後成大蘿蔔. haha (左下角的兩條就係我同sweetcat ge )

搽上蛋液. 再灑少許燕麥片

出爐la . 好香呀!! 阿sir 即場仲有牛油俾各位同學仔搽黎食

這就是我的bb . 第二日食咗半個做早餐. 已經好飽. 唔知係咪多纖維的關係

橙味包包發酵後很巨型

阿sir 用了佢預先準備的麵糰做成慧星包形狀.

出爐了. 勁靚. 好可愛 ( 不過個底就會扁咗)

我們得兩舊仔麵糰. 放了入吐司模發酵

出爐後便成小餐包形狀了. (呢個包包都有橙香. 而且很軟熟)

明天就上第四堂la. 希望自己d 包包技術可以有進步la

 

咖喱拉麵

之前買了些咖喱磚. 除咗煮咖喱飯外. 今次就試下煮麵

買咗日式拉麵. 廿幾蚊有三包. 初初搵唔到放係邊. 原來放係雪柜那兒

仲買埋淘大煎餃來做餸. 咁又一餐la (睇落都唔錯呀)

不過個湯煮得咸咗. 下次要再改下

原食譜係清湯300ml +2塊咖喱磚煮一人份

而我就用了600ml 雞湯+2.5塊咖喱磚, 不過就好咸同都有d 辣.
我覺得係用雞湯的關係, 下次用清水應該都可以了

Curry Ramen

黑芝麻乳酪凍餅 (附食譜)

5月的Librarian 生日會

今個月原本應該有四個同學生日. 不過有兩個係中五同學. 已經走咗

通常我地都係lunch 食蛋糕. 會send 紙通知佢地. 但後來就只得一個中一上咗黎

我怕另一個中六同學收唔到通知. 所以去班房搵佢

不過我好烏龍. 居然把兩個中六同學的生日月份調轉了.

好彩兩個都係班房. 唔係就變咗生日的冇得食. hehe

我上年都試過出錯. 個同學11月7日生日. 但打落excel 就出咗7月11日

11月時個同學同我講話佢有份生日, 我仲話佢講大話. 唔俾佢食. haha

好彩佢同我friend  .先冇野啫!! 唔係實嬲死我

今次個蛋糕都幾好味啊. 雖然係凍餅. 但係用甜忌廉整. 冇奶味. 所以我都有份食.
上面的珍珠是糖來的. 幾靚., 一蚊包咋. (係元朗見到即刻買)

整完個大蛋糕.仲有少少材料整. 所以用個鳳梨酥模整多兩件細的

都幾精緻啊!

《清怡甜點》

蛋糕材料 :

麵粉             75g
粟粉             1湯匙
發粉             半茶匙
糖               75g
雞蛋             3個
溶化牛油         2湯匙
黑芝麻醬         1湯匙

芝麻乳酪凍材料:

原味乳酪         2小杯 (我用了一杯135ml)
魚膠粉           1.5湯匙
水               3湯匙
糖               4湯匙
黑芝麻醬         2湯匙
甜忌廉           1杯

蛋糕做法  :

1. 粟粉, 麵粉,發粉同篩勻; 溶化牛油與黑芝麻醬拌勻
2. 雞蛋與糖同打約8分鐘, 篩入做法1.的混合粉拌勻
3. 沿碗邊傾入牛油黑芝麻醬, 拌勻, 放入己墊牛油紙的20厘米正方型焗盤內, 放入己預熱烤箱, 用180c 焗20分鐘

芝麻乳酪凍做法 :

1. 魚膠粉與水同座於熱水中, 拌勻; 甜忌廉打起, 待用
2. 乳酪加入糖及黑芝麻醬拌勻, 注入魚膠粉水拌勻, 拌入忌廉即成

組合 :

1. 將蛋糕橫切一半, 放一片蛋糕入模內, 倒入一半芝麻乳酪凍, 抹平
2. 鋪上另一層蛋糕, 倒入餘下的芝麻乳酪凍, 抹平, 放入雪柜冷藏4小時至凝固

Black Sesame Yoghurt Mousse Cake
     

麻甩"友"

襯著母親節幾天假期. 湊了表弟回來渡假

轉眼間佢已經大過咗好多. 已經唔再bb .係一個小朋友了

加上樣子又老積. 兩歲幾就由麻甩B .跳升為麻甩" 友". haha

星期日同carmen帶咗佢去濕地公園行下

見到呢隻蝴蝶. 其實都唔係好靚. 不過阿b又走埋去. 所以都影張la

自己扮蝴蝶仲得意la

bb 虫. 哈哈!!

行咗三次貝貝屋企. 只係見到一次.仲要轉眼即逝. 影完張相. 已經影都冇埋
張相又反光. 大家見唔見到佢條尾

阿b 剪咗頭髮. 個樣very seven

仲要踎係度食百力滋. ~~大陸B. haha

呢張相影得更老積. 他還未夠三歲啊!! 影到咁大個

佢坐住那張紫色椅. 係我四歲時買的. 廿幾年了坐到而家都仲係咁穩陣
就算我老豆.一個肥佬坐係上面都冇問題.
當年同細佬一人一張. 佢那張綠色. 而家係大表弟屋企
可以坐到變古董.

同場加映婆婆隻狗. 都係叫豆豆

係一隻混種松鼠. 個樣好得意. 但就成隻熊人咁大隻 (人地松鼠超的式ma....)

阿B 將來 :

今晚(14/5) , 佢就應該離開寄養家庭. 返去佢媽咪度

但其實我舅母有同過我媽咪講話佢唔想湊. 但個社工要佢湊番
而且. 對上一年. 舅母的精神都係有問題. (可以一日訓十幾個鐘.)
就連寄養家庭的阿姨只係見過舅母一次. 都覺得佢有問題.(但個社工就成日話佢冇問題. 仲好好, 仲話一路都只係聽我地話佢唔好. 咁我地夠只係聽你話佢好la)

佢地兩公婆又會打架鬧架. 嚇親阿b. 試問阿b 係咁ge 家庭長大會好得去邊

佢係一個精靈聽話的小朋友. 但可以想像跟番佢父母一定係冇前途
(個社工仲話小朋友跟番媽咪係最好!! 鬼唔知咩. 咁而家佢媽咪係唔負責任呢種人ma).

我一切的係為小朋友著想. 大人的事我唔理. 舅父佢地都大人了. 要死你阻得到嗎
但阿b 只係得兩歲幾. 我唔想佢之後就咁學壞呀!

最後同個姑娘嘈架咁滯 (祥情太多......), 總之結論就係我地覺得佢媽未適合湊回阿b
但個姑娘就話佢冇問題......唉!!!

真係好唔鍾意個社工. 硬係覺得佢想推番阿b 俾佢阿媽就可以了結件事咁....
雖然我明白其實係要番d 大人負責任. 如果個個都係咁唔要d 小朋友. 政府就好煩.
但點解唔係用個小朋友黎做出發點喎!

我地點付出都冇用. 因我地係外人. 話事權係係佢媽咪度

雖然舅母有話過轉我媽咪做監護人. 但係社工話若係咁. 我地只可領取阿B 的綜援. 但學費就冇. (但最貴係D 學費)
我問 : 都係用係個小朋友度, 點解會咁?佢話 :因為係跟家庭收入. 我屋企冇攞綜援, 阿B 跟我地就計係我地屋企. 所以要評估我地屋企GE 經濟狀況.

都唔知咩道理

應該冇試過係blog 打咁大篇字.