魷魚蒸肉餅 (附食譜)

上次整馬蹄肉餅. 落咗勁多馬蹄又切得大粒.
最後攪到碟野係肉餅蒸馬蹄....... 哈哈. 老公話食完唔夠飽

今次我醒la. 買少d 又切得細D. 仲加埋魷魚去蒸

原來d 魷魚咁貴. 要成12蚊一隻....

今次好好味呀. 老公都讚. 好耐冇見過佢一路食一路笑個樣啦. hahaha

材料：(4人分量)

肥肉40克、瘦肉240 克、乾魷魚1隻約40克、蔥粒1湯匙、馬蹄6粒

調味料：

鹽1/4茶匙、糖1茶匙、生抽2茶匙、胡椒粉少許、粟粉1茶匙半、紹酒2茶匙、麻油1茶匙、水3至4湯匙

1.乾魷魚浸軟洗淨，去皮切成小粒。

2.豬肉洗淨抹乾，剁碎，加入調味料拌勻。

3.馬蹄洗淨去皮，拍碎或切成小粒；蔥洗淨亦切粒。

4.混合乾魷魚馬蹄及碎豬肉，放入碟內，用刮刀輕壓抹平，放鑊內蒸約10分鐘，以蔥粒點綴，趁熱進食。