胡蘿蔔粟米海底椰湯(附食譜)

番屋企見到阿媽有個電煲湯煲. 可以較時間制. 又唔駛睇火. 又慳煤氣

幾百蚊又唔貴. 攪到我都想要一個

但都幾大舊下. 不過我又唔係成煲湯.......

但買咗又會唔會煲多d 呢???


海底椰潤肺止咳. 此湯滋潤解燥

但上網睇到又話呢d 係街市買到透明ge海底椰係冇功效同味道ga !!!

不過廿蚊六舊. 今次只係用咗三舊.  下次煲埋佢. 以後都唔再煲.

今次煲得好有火喉啦. hehe

材料:

胡蘿蔔          2支
粟米              2支
鮮海底椰      約150g (我下了三舊)
豬展              約240g

做法 :

1. 胡蘿蔔去皮切滾刀塊. 粟米切段. 洗淨. 備用

2. 海底椰去衣切片飛水. 洗淨備用. 豬展飛水備用

3. 將所有材料放入煲中. 加適量水煲至滾. 轉中小火煲2.5 小時至材料淋. 加鹽調味即可