沙嗲洋蔥薯仔炆雞翼

薯仔炆雞翼. 永遠都係家庭菜頭幾位.

今次跟史雲生食譜. 加咗沙嗲醬. 味道都不錯啊

但可惜煮的時候我忘了要較細火. 煮到中途居然乾哂水.

要加水去煮. 溝淡咗. 唔係應該更好味呢 !

材料

史雲生清雞湯250毫升

雞中翼8隻

細洋蔥(切角)1個

薯仔(切角)2個

紅辣椒(切片)1隻

蔥(切段)1條

沙嗲醬2湯匙

糖½茶匙

生粉水埋芡適量

做法

• 1雞翼用少許麻油及胡椒粉拌勻 。
• 2燒2湯匙油， 把雞翼煎至微黃色，加洋蔥，薯仔，紅辣椒 蔥及沙嗲醬兜勻，注入史雲生清雞湯，加½茶匙糖，改用中慢火蓋好炆20-25分鐘。
• 3雞翼及薯仔炆熟後拌入適量生粉水埋芡。

史雲生小貼士：雞翼解凍後用少許麻油及胡椒粉醃可辟除 ‘雪味’。

椒鹽煎雞翼

因為雞翼份量多咗. 我咪將醃料都加番. (下次唔駛加倍....)

點知咸咗少少. 如果送飯都ok

唔送飯變得是有點太咸了

而家老公轉咗工. 呢期佢都可以陪我一齊買餸. 或者買定餸回來 (我order . haha)

希望咁樣可以慳到時間. 可以快d 開飯啦 !

《百變雞翼cook 得起》

材料 :
雞中翼     8隻
乾蔥         2粒(切碎)

醃料 :
椒鹽　　1湯匙
雞粉        1/4茶匙
胡椒粉    少許

做法 :

1. 先將雞中翼洗淨, 抹乾, 以醃料拌勻醃15分鐘

2. 燒熱1湯匙油, 下乾蔥碎以慢火爆香, 加入雞中翼以慢火煎至金黃熟透. 盛起. 上碟

煙肉芝士焗蠔

係吉之島見到呢隻急凍半殼蠔. 平時都好少見.

$39.9  有十隻咁上下. 都ok 抵食.

就買番黎試下.

開頭睇食譜. 有隻芥辣焗蠔. whatapps 俾老公. 佢話聽到都唔開胃. hahaha

咁唯有試番d 正常野

呢個煙肉芝士蠔都幾好味. 可惜我焗到燶咗 少少

跟Bonnie Yves食譜

材料:
生蠔 4隻
煙肉 2塊
麫包糠 少許
芝士碎 少許
黑椒 少許
海鹽 少許

1) 將生蠔洗淨.
2) 炒香煙肉.
3) 先晒上鹽及黑椒, 再鋪上麫包糠, 煙肉 及芝士碎.
4) 220度焗15分鐘或至金黃.

YvesTips!
* 炒煙肉時不用落油, 因煙肉會出油.

星洲炒米

日日放工煮飯. 有時真係好累.

但唔煮又唔知食咩好.  成日出街食又貴喎 !

唯有有時煮下d 粉麵當簡單d 又好. 有d 變化都好啦 !

今次選擇咗星洲炒米. 買咗15蚊叉燒. 都係得半碗仔........(勁貴)

味道ok. 不過我覺得可以再辣d .

材料：

米粉……………….……………….約半斤

蝦仁……………..…………………適量

叉燒(切絲)…….……………….….適量

蛋(煎熟切絲)……………………...1隻

洋蔥(切絲)…………………………半個

青、紅椒(切絲)…………………...適量 (我冇落)

銀芽………………………………..適量

韭黃………………………………..適量 (我冇落)

蒜茸………………………………..少許

 

調味料：

咖喱粉……………………………..適量(約1-2茶匙)

黃薑粉……………………………..適量(約1茶匙) (我冇落)

鹽………………………………..…少許

醬油………………………………..少許

 

做法：

1.      米粉用滾水灼好，過冷水後瀝乾水分。

2.      蝦仁洗淨吸乾水分，用少許生粉及胡椒粉拌勻放雪櫃備用。

3.      熱鍋爆炒蒜茸，加入咖喱粉及黃薑粉，炒至透出香氣，下蝦仁、叉燒、洋蔥、青紅椒、銀芽及米粉炒透，最後下韭黃，加調味炒勻上碟。

 

Tips

米粉應選用炒米粉，不要灼太熟，不然炒出來會黏成一塊。

粟米龍脷柳

第一次煮魚柳 . 原來都ok 好味噃 煮咗一大兜粟米汁. 老公仲話好味過係街吃的粟米班塊, 呢期煮飯老公都大讚有進步. hehe 我自己都好鍾意 ! 下次再買黎試下第二d 煮法先 材料

龍脷柳 230克 蛋（打爛） 1隻 生粉 1杯 忌廉粟米 1/2罐 水 1/2杯 雞粉 1/4茶匙 蛋白 1隻

製法

1. 龍婣柳洗淨抹乾，切件，加入調味料，醃約5分鐘，拌入蛋汁，沾上生粉。 2. 魚塊放入滾油內炸至金黃，取出隔油。 (我冇炸啦. 煎都好脆. 仲唔洗整兩次) 3. 忌廉粟米與水及雞粉同燒滾，拌入生粉水埋芡，翻滾，拌入蛋白。 4. 放入魚塊再炸至香脆，取出上碟。 5. 粟米汁淋魚塊面，便可食用。

調味

鹽 3/4茶匙 胡椒粉 適量 麻油 適量 埋芡 生粉 1湯匙 水 2湯匙

蒜香豉油雞

呢個雞真係超方便又好好味 就咁醃咗佢. 再用鍚紙包住扔入焗爐就可以. 出來味道仲非常濃郁. 老公讚不絕口. 過咗兩日都仲係度提緊呢味餸. 哈哈 不過由於我唔識斬雞的關係. 我都係去惠康買d 已經斬咗ge. 都幾方便. 啱哂我呢d 唔識斬雞的人. 唔係我就只可以煮雞扒同雞翼. haha 材料

雞 1/2 隻 或 春雞 1 隻 [斬件] 薑 8 片 蔥 4 條 [切段] 李錦記蒜蓉 2 湯匙

製法

1. 雞件醃15分鐘。 2. 將蒜蓉、薑、蔥與雞件拌勻。 3. 用錫紙包好雞件，蒸或焗[攝氐230度或華氐450度]約15分鐘或至熟。 (15分鐘不夠la. 我覺得要25-30分鐘才熟)

調味

醃料： 李錦記豉油雞汁 3 湯匙，李錦記舊庄特級蠔油 2 湯匙，糖 1/2 茶匙，粟粉 1茶匙

咕嚕雞塊

原本個食譜係話把雞塊切成1cm 丁狀. 1cm !!!!!!

我要切到幾時呀 ! 都傻傻地. 最後我亂咁切成一塊塊就算.

不過d 雞扒. 硬係會有少少雪味咁.......係咪我醃得唔夠呢 ?

材料 :
雞脾肉     150g
青椒        半個 (切塊)
菠蘿        一片 (切粒)
蒜頭        一粒 (拍碎)
洋蔥        1/4個 (切塊)
生粉水     適量

醃料 :
薑汁, 酒  各2茶匙
生粉        適量

(我自己懶整薑汁. 所以只係求其下d 胡椒粉. 雞粉去醃咋)

汁料 :
上湯　　半杯
砂糖　　2湯匙
鹽          少許
生抽       1湯匙
白醋       1.5湯匙
茄膏       半湯匙

做法 :
1. 雞脾肉去皮, 洗淨吸乾水, 切成約1吋的丁方狀, 加醃料醃30分鐘, 放入熱油中炸3分鐘 (我都係煎熟ga 咋)

2. 燒熱油, 爆香蒜頭, 加入洋蔥及青椒炒香, 加入己拌勻汁料煮1分鐘, 加生粉水埋獻, 放入雞丁和菠蘿炒勻, 上碟

魚滑煮娃娃菜

睇方太呢本舊作叫三十元開飯. 而家d 野貴咗咁多. 係咪真係仲可以三十蚊就開到飯 ???

定係要改三十蚊一餸 ?? haha

不過呢碟餸. 我都係買咗16蚊材料啫.

魚肉都幾彈的. 有點似魚肉湯的味道

《三十元開飯》

材料 :
娃娃菜       2棵
鯪魚肉       2兩
蝦米           半湯匙 (我冇落)
蔥粒           少許

調味料 :
鹽. 生抽     各少許

做法 :

1. 娃娃菜洗淨後切成塊狀, 蝦米浸軟剁碎, 加入鯪魚肉中,並加入生粉, 胡椒粉, 鹽. 蔥粒各少許攪勻. (我自己再加咗少少麻油)

2. 將上項鯪魚肉用茶匙逐少刮放入煮滾的清水中至熟, 撈出, 瀝去水份, 待用

3. 燒熱油, 將娃娃菜放入爆炒, 放入調味及適量水份, 煮至菜淋, 加入已熟的鯪魚肉煮勻, 用少許生粉水埋芡即可

tips : 鯪魚肉可加入蛋汁少許, 會變得較軟, 想要彈牙一點則不需加蛋汁

流啡

11月18日. BB 5wk 4d


係14號晚同17號朝. 尿尿時都見到有兩滴啡色or 粉紅色.

雖然之後都冇再見到. 但為咗安心. 都係今日 18/11 去睇咗醫生


因為急. 所以去咗元朗睇楊立和. 有blog 友介紹. 而且佢可以walkin 入去睇. 唔駛等
另一位醫生. 佢話最快要去到24號先有得睇呢........


姑娘很好人. 登 記時已告訴我得5wks 未必見到bb. 咁我就問. 唔通由佢流. 佢又話唔係.驚我睇唔到失望啫!

因為週數少. 所以照陰超. 醫生話有少少啡色啦 ! 但都唔駛太緊張ge

係超聲波上. 因為太細. 所以只係見到胎囊. 醫生話入面有一點就係bb 啦. 我同老公.係咁問. 呢點 ? 呢點 ? 醫生都話唔係.......

所以都唔知邊點. 哈哈 !

今日係5w 4 d . 但張相有個位寫住4w 1d (係咪阿b 個大細呢 ? ) 咁咪細咗law......

不過醫生又話唔關事......





因為只係得數滴啡. 所以又唔駛太緊張. 休息多點. 唔好太操勞便可

開咗一個星期荷爾蒙安胎藥同三日病假......

咁就多謝$950 啦 !!! 好拿利!!!! 肉赤死

唔該阿b 你乖乖地. 坐定定. 唔好再嚇我同要我破財啦 !

阿b第一張沙龍就係得個黑影．　haha

Marie做型朱古力芝士蛋糕

朋友仔下的order. 話想要marie .....我都鍾意marie 的呢!!

同埋佢唔要cream cake. 咁仲好. 芝士餅仲方便.

整完個marie 之後. 其實我發現我填錯色. haha. 不過其實都唔係太覺ge.

餡:

Cream Cheese - 250g (30元有500g)

糖 - 80g

甜忌廉 - 160ml (30元有1L)

中SIZE全蛋 - 2隻

可可粉 - 4湯匙(20G左右) 50元有一大罐

檸檬汁 - 少許



餅底:

OREO 餅 - 100G (無餡) (7元有一筒, 不過建議在材料店有賣淨OREO餅乾)

牛油 - 50G (14元有200G)

1. 把 餅碎和牛油溶液混合. 鋪在模上壓成餅底

2.之後我們先把芝士放入微波爐用低火叮1分鐘左右 , 目的想把她叮軟....之後搞一會兒後 分幾次放入糖

3.倒入糖後的芝士應該會更軟身, 分幾次放入可可粉

4.幾次倒入混合好的全蛋液...(如想香一點可以放入檸檬汁) , 期間把爐預熱180度底+面火


5.最後分次倒入忌廉就完成...


6.倒入OREO模中...之後底包上錫紙和微波爐用保鮮紙, 以180度底+面火, 盤座水焗45MIN !

上海炒麵

上海灘之夜最後一味便是上海粗炒. 當然我地有蒸幾隻小籠包加餸. haha

其實呢個味道挺好的.

就衰在........我沒把麵條煮淋. 應該要在水中煮耐多一點時間. 我太快便離鍋.

中間是有點所謂生骨了. 

材料(二人分量)：上海拉麵300克、瘦肉160克、白菜苗(或椰菜)200克

瘦肉調味料：生抽1茶匙、糖1/2茶匙、粟粉1茶匙、麻油1/2茶匙

麵調味料：生抽3/4湯匙、老抽1.5湯匙、糖1/2茶匙、熟油1湯匙

 

1. 瘦肉洗淨吸乾水分，切絲後調味；白菜苗洗淨切粗絲待用。

2. 上海麵放入沸水中煮約2至3分鐘，盛起過冷河後瀝乾水分，拌入調味料。

3. 燒熱2湯匙油，瘦肉炒至轉色，加入白菜絲及3湯匙水再炒，待白菜軟身(連汁)盛起。

4. 燒熱鑊放入麵，加菜汁炒麵至熱，再加入已煮好的肉絲及白菜炒勻即成。

備註：若用乾麵條的話只需200克，放入沸水煮約5分鐘後撈起，切勿過久，以免失去口感。由於麵已加調味及油撈過，煮麵只需下菜汁，不必再加食油炒。若用豆腐乾或素肉絲取代肉絲，則適合素食者。

上海酸辣湯

上海灘之夜最成功就是這個酸辣湯. 真係和街的好相似.

我自己就再加多咗豬皮. 同埋舊豆腐唔係一半而係成舊( 費事side) 所以都加多咗水.

但都係太多料la. haha

原來酸辣湯的辣係由豆辨醬而黎. 所以酸辣都可以自己再調較

呢個煮法好 簡單. 又好好味. 我自己好滿意 !!

材料：(2至3人用)

冬筍 (罐頭) 60克、雲耳2至4 隻 (30克) 、冬菇3隻、硬豆腐1/2片、瘦肉70克、雞蛋1隻、芫荽少許

瘦肉調味：

鹽1/2茶匙、糖1/2 茶匙、生抽1/2 茶匙、油1茶匙

湯底調味：

上湯500毫升、水250毫升、辣麵醬3湯匙、鎮江醋3湯匙、老抽1湯匙、鹽1至1/2茶匙、糖1茶匙、麻油2茶匙

粟粉芡：粟粉3湯匙(用3湯匙水開成粟粉水)

做法 :

1.將冬菇、雲耳洗淨浸軟後切絲；冬筍、硬豆腐切絲。

2.瘦肉切幼絲，放入調味。雞蛋打散。

3.在易潔煲內 (可不用放油) 將肉絲炒香後放入冬菇、雲耳、冬筍、硬豆腐略炒後，加入上湯。

4.湯煮滾後慢慢加入蛋漿造成蛋花。

5.放入其他湯底調味，最後加入粟粉芡及芫荽作裝飾即成。

排期+oscar 講座

11月14日. BB 5wk 0d


上星期二(8/11)取了半天假去天水圍健康院排期. 聽朋友講拎咗好多証明文件

但最後原來只要身份証和醫生紙. 其他咩住址証明. 結婚証書. 下次先要.


等咗一陣. 姑娘就俾咗一d 資料同文件我

要我係14/11 去屯門醫院聽oscar 講座

同埋3/1 去健康院檢查


今日(14/11) 老公陪我去了聽講座. 姑娘話聽完講座後有得照超聲波. (個講座其實只係睇十分鐘片) 但要7 wks 先有得照

其實我都知我咁早發現冇得見阿b住啦　！　但都係要坐咗個幾鐘先到我．　

姑娘計今日阿ｂ　剛好 5wks0 days

要再約到2/12 先去照 !

到時就係第一次見到你. 應該有7 wks 多了. 唔知睇到心跳未呢 ?

你到時記得要唱首一閃一閃小星星俾媽咪聽. 當賀聖誕噃. hehe

麻醬海蜇粉皮

開頭找咗兩間凍肉店. 都找不到即食海蜇. 朋友叫我到雜貨店問一問. 點知得自己回家再發的那一種

我未有呢個層次啦  !

最後買到la, 但居然又找不到粉皮. 來來回回去街市與超市之間. 行咗成四次.

不過我覺得呢隻粉皮唔夠以前我係大昌買.放係雪柜那種好食

今次買呢種係乾的. 要自己浸軟.

我覺得有點點硬啦. 而且是不可以隔夜再吃. .....因為即食都ok. .再雪已經好硬了....

不過呢個汁係好好味的

材料 :

粉皮　　　　1包
即食海蜇      2包
蔥絲             適量

醬汁 :
芝麻醬         2湯匙
花生醬         2湯匙
鎮江醋         2湯匙
麻油            1湯匙
糖               1湯匙
生抽            2湯匙
蒜茸            1茶匙
薑茸            1茶匙

做法 :

1. 粉皮切絲, 放入沸水中略灼. 瀝水備用
2. 海蜇放入沸水中, 立即撈起, 浸冰水後. 瀝水待用
3. 粉皮鋪放碟內, 放上海蜇, 混合醬汁材料, 淋在海蜇上, 飾以蔥絲, 吃時拌勻. 即可

tips :海蜇不宜灼過久，　宜一灼即撈起．　如喜愛多些層次，　可加入雞絲及

上海素雞

呢餐我整咗個上海灘之夜. 其實都係得幾樣野食咁大把. haha

同blog 友仔傾開. 佢居然講笑問我係咪著旗袍出場. 迎合番我個上海灘之夜. 真係笑到我肚痛

第一碟係上海素雞. 跟may 姐的食譜

不過太大陣肉桂味啦. 我馬馬地la.  但同老公都食咗半碟以上ge

下次都係就咁撈麻油算la

材料（4人份）

素雞（洗淨、抹乾） 2件

八角 1粒

肉桂條 1條

月桂葉 2片

生抽 1湯匙

雞粉 1/2茶匙

水 2杯

油 2湯匙

冰糖 1湯匙

做法

01.素雞打斜切成1/4吋厚。

02.燒熱鑊下油，油熱後下素雞煎至淡金黃色，盛起待用。

03.水連八角、肉桂、月桂葉放小煲煲滾，加入素雞件，中火煲20分鐘。

04.下冰糖、生抽、雞粉，慢慢炆20分鐘至糖完全溶化。待涼後置雪櫃，食前才取出。

TIPS

‧如果你非常趕時間，不能照這個方法做，你可以買素雞回來，拌少許麻油當前菜食，不過味道當然完全不同。

冬菇肉粒燴西蘭花

唔知係咪我浸冬菇浸得耐. 定係d 冬菇唔靚.

我覺得有咩冬菇味ge. 整個餸都有點淡

今次買咗兩棵西蘭花. 我覺得係有點多la. 都吃不完

下次都係唔攪咁多. 炒其他菜算la

材料 :
西蘭花         1棵
乾冬菇         6隻
瘦肉            80g
蒜茸            2粒
上湯            1/4杯

醃料 :
生抽           1.5湯匙
糖              半湯匙
胡椒粉        少許
生粉           2茶匙
麻油           少許

做法 :
1. 乾冬菇洗淨, 加入暖水蓋好放置20分鐘待軟, 搾乾水後切粒, 浸冬菇水留用

2. 西蘭花切成小朵, 放大碗內注入清水至蓋面, 拌入1茶匙幼鹽, 放置15分鐘, 沖淨後以滾水略灼, 過冷河備用

3. 瘦肉切幼粒, 拌入醃料備用

4. 鑊內放入2茶匙油及蒜茸, 以中溫爆香蒜茸, 加入瘦肉粒, 冬菇粒略炒, 傾入西蘭花炒勻後放入上湯及浸冬菇水煮至滾, 加蓋略煮即可

tips :浸冬菇必須加蓋以免香氣流失
　　西蘭花必須出水以去除草青味

可樂雞翼

我記得係好耐以前. 我剛好煮野食的時候. 我都有煮過可樂雞翼.係一班女孩子的X'MAS PARTY

可能我煮得太慢. 朋友搶咗黎煮. 我一路讀D 情序俾佢聽.

佢叫我收聲. 唔好嘈. HAHA

今次自己再煮. 已經係成功人仕. 味道VERY GOOD 啦 !

老公只係汁都送到飯. 咁下次唔駛煮咁多雞翼LA. HAHA

材料 :
雞中翼        6隻
蒜頭           1粒 (略拍)
紹酒           少 許

汁料 :
可樂　　　 1罐
生抽           半杯
冰糖           40g
八角           3粒
薑              2片 (略拍)

做法 :

1. 雞翼洗淨, 以吸水紙吸乾水份, 汁料拌勻 , 煮滾, 以慢火煮約10分鐘至汁料出味

2. 燒熱1湯匙油, 爆香蒜頭, 將雞翼兩面煎至略帶金黃, 灒酒

3. 將 雞翼轉放入汁料中煮10分鐘, 蓋上, 熄火, 浸15分鐘便可

tips : 煎雞翼時灒酒, 汁料加入薑.有助辟除雪味

蔥燒廣島蠔

之前係吉之島買咗包廣島蠔. 好似15x 一包. 但我地兩公婆. 其實都可以食成三餐ga la.

每次都係8-10粒度

呢個蠔真係好好味. 個汁超正

老公都勁讚 !! 原本我諗住食三隻. 留多d 俾佢ga.但最後都忍不住偷食多件呢. 哈哈

材料：急凍廣島蠔肉300克、薑4片、京蔥1枝(切段)、幼蔥1棵、生粉少許

調味：

海鮮醬1湯匙、酒1湯匙

 

1.蠔肉解凍，清洗乾淨。

2.放入一鍋沸水內，下幼蔥及２片薑同煮1至2分鐘，即取出。

3.瀝乾蠔肉，兩面拍上生粉，放鍋中以半煎炸方式煎至兩面金黃，盛起。

4.餘油倒去，再燒熱鍋，下薑片及京蔥爆香，加調味。

5.蠔肉回鍋，拌炒至材料熟透，即成。

蒜香欖菜蒸肉餅

呢一晚準備好去買餸. 先知老公有野做會夜d 反. 初初估計都係九點啫. 遲半粒鐘都ok 呀 點知8:45 打俾佢都仲未走得. 等到最後都係自己一個人食呢. (因為我已經好肚餓啦．而且又唔想咁夜食飯喎) 平時d 欖菜. 我多數用來炒豆角 原來蒸肉餅都好鬼惹味ga 老公夜d 反黎食. 都係咁讚呀 !!　見到佢鍾意食就開心啦　! 材料

免治豬肉 [剁碎豬肉] 170 克 [6 安士/4.5 兩]，馬蹄 2 粒 [切細粒]，芫荽及紅辣椒絲 灑面用 [隨意] 調味 醃料： 李錦記蒜蓉 1 茶匙，潮州橄欖菜 1 1/2 湯匙，李錦記舊庄特級蠔油 (唧唧樽) 1 湯匙，水 1 湯匙，粟粉 1 湯匙

製法

1. 免治豬肉及馬蹄與醃料拌勻，用大火蒸10分鐘或至熟，飾以芫荽碎及紅辣椒絲。

中大獎

話說我好鍾意玩抽獎遊戲. 仲成日都抽中. 今次終於中到份特大獎啦!! 哈哈



想要bb 已經一段時間. 由3月結婚之後一直都沒有避孕. 但亦都冇理

直至八月一次誤以為有咗. 很失望. 之後便開始真正的計劃

做了很多功夫

有計算排卵期la. 驗紅D . 吃葉酸. 煮好野俾老公食啦. 自己飲下花膠湯啦. 咩都有做下

頭兩個月見到M 都超唔開心. 有時直情發老公脾氣. HAHA




今個CYCLE. day 1 係10/10 , 23/10就見到有深粗. 前後都有努力.

而係呢個星期星期.(1/11開始)已經勁有想黎M 的FEEL. 個胸係呢個星期好漲. 有少少痛. 但又唔係話好痛ge

咁都有諗. 會唔會今次有呢 ? 但上兩個月唔ok .心裡面都係打定輸數. 免得自己空歡喜一場

5/11 (day 27) 朝早起身 . 心血來潮. 都係忍唔住想驗一下　（正常應該9/11先黎m ge)

平時我都會睇住佢. 今次因為都預咗冇. 反而仲去扔垃圾呀. 換衫呀咁. 再反去廁所睇. 好似有條淺線喎 !

即刻叫醒老公睇. 佢都即時醒一醒. 話好明顯有線.

跟住我就再去買支cb試下．　

不過就拖到下午先驗. 等咗3分鐘. 顯示到我有2-3weeks 啦!!

好開心!!! (不過又冇想像中咁興奮)

老公即刻反黎陪我睇醫生. 仲拎埋醫生紙.下星期就可以去排期lu

預產期 係 17-7-2012 是一個夏天的小寶寶呢 !


成日諗住唔成功之下發現咗你 ^^ . 終於輪到我做人媽咪啦 !! yeah !!

要乖乖成長啊 !

係醫生度check 完. 攞咗醫生紙. 俾咗$210 就係拎呢堆野回家

銀芽肉絲蛋花湯

呢個湯的成本只係九蚊雞咋. 真係好平. hehe

銀芽2蚊. 雞蛋一隻當夠佢兩蚊. 5蚊瘦肉 (當然就咁買. 人地唔會賣俾你. 我呢餐仲有肉餅. 加埋一齊買就冇問題)

平平地都叫有啖湯飲下呀 !  抵 !

材料:

銀芽           100g
瘦肉           120g
雞蛋           1隻(打勻)
薑               2片

醃料 :

生抽         1茶匙
糖             1/3 茶匙
粟粉         1茶匙

做法 :

1. 瘦肉洗淨, 抺乾水份, 切絲.加醃料醃15分鐘, 備用
2. 銀芽洗淨, 瀝乾水份, 燒熱少許油, 爆香薑1片下銀芽略爆炒, 盛起, 備用
3. 煮滾適量清水, 放入薑1片及肉絲滾5分鐘. 再放入銀芽, 待再度滾起, 熄火加入蛋液攪勻. 適量鹽調味

蒜香豬扒

我覺得呢個豬扒好有媽媽味道呢. 和我媽整的味道都相似.

不過佢煮得淋d . 可以我剁得唔夠........

而每晚坐係梳化睇食譜諗下第二日煮咩好. 已經成為我的新節目啦 !

其實寫blog 也是我煮新餸的原動力呢 !! 哈哈 !

唔係邊有野食. kakaka

《俩口子住家菜》

材料 :
無骨豬扒   6-8塊 (開半)

醃料 :

老抽         半茶匙
生抽         1茶匙
蒜茸         2湯匙
乾蔥茸      1湯匙
鹽             半茶匙
糖             半茶匙
油             1茶匙
生粉          1茶匙
水             1/4量杯

做法 :
1. 豬扒兩面用刀背均勻地拍鬆, 下醃料醃15分鐘
2. 大火下油約1湯匙起鑊, 下豬扒煎至兩面金黃色, 注入熱水半杯, 加蓋焗至水分乾透 (約3-5分鐘) .上碟即可

煙肉法芥炒四季豆

之前用剩咗包煙肉. 諗住清埋佢.

找食譜見到呢個中西合壁煮法. 又幾得意喎

雖然寫話法芥. 但買唔到. 只係用咗英式芥辣. 不過我估味道應該冇咩分別ga

煮完出黎都係食到少少味ga 咋.

材料 :
四季豆　　　　300g
煙肉                3片
洋蔥                1/4個 (我唔記得咗落)

調味料 :

鹽及胡椒　　　適量
白酒                2湯匙
法國芥末          2茶匙

做法 :

1. 四季豆摘蒂去筋, 切成小段, 煙肉切碎, 洋蔥切幼絲備用
2. 四季豆先飛水過冷河瀝乾
3. 鑊中放2茶匙油及煙肉碎以中火爆香洋蔥絲, 放入四季豆轉高溫爆炒數下, 快手拌入調味料炒至乾身即可

沙嗲果仁炒魚條

話說買魚肉時發生咗個笑話

d 魚肉已經由七蚊四兩去到八蚊. 但唔緊要. 因為我買好少

咁我就同老闆講要八蚊啦.

咁佢就話 : 咁少 , 夠食ga la. 我就話 : 我地兩個人食咋. 夠ga la

跟住佢 : 哦. 原來係你一啖我一啖咁. 真係恩愛ge啫 !!

真係聽到我滴哂汗.......

《不辣不吃》

材料 :
攪碎魚肉　　　　160g
蒜頭                    1粒 (切片)
沙嗲醬                 2湯匙
西芹                    160g
紅椒                    1隻(切塊)
甘筍花                 8片
炸脆腰果             80g

醃料 :

鹽　　　　　1/2茶匙
醬油             1茶匙
生粉             1茶匙
麻油             少許
胡椒粉           少許

調味料 :

醬油             1茶匙
蠔油             1茶匙
糖                半茶匙
麻油             少許
胡椒粉          少許
生粉             1茶匙
水                 5湯匙

做法 :
1. 把魚肉加醃料, 攪打至起膠, 用油煎成魚餅, 待涼後 ,切條備用

2. 燒熱油鑊, 把蒜片和沙嗲醬炒香, 倒下所有蔬菜炒熟, 將魚條回鑊, 下調味料, 煮沸, 最後加入腰果, 炒勻上碟

照燒雞扒

印象中好似係第二次買味醂 .
上次都係用得一兩次就扔咗. 而家多咗煮飯. 一定要唔好side 野先得呀

原來照燒汁就係醬油. 糖同味醂溝成

老公好鍾意呢個汁. 佢話塊雞扒好好味.

我自己呢..... 塊皮就好好味ge. 舊肉就啖咗d. 但到我打食譜時先發現

人地話兩面都要塗上汁. 但我只係塗咗係雞皮那邊law. 咁唔怪得舊肉冇味啦..........

材料 :

雞脾肉或雞胸　　　2件

醃料 :
薑汁                       1茶匙
酒                          2茶匙
醬油                       2茶匙
生粉                       少許

燒汁料 :
酒                1湯匙
砂糖             1湯匙
醬油             3湯匙
味醂             50ml

做法 :
1. 雞肉洗淨, 以吸水紙吸乾水份, 用叉在雞上刺上適量小洞, 加醃料拌勻, 醃15分鐘

2. 預熱焗爐, 雞脾肉(皮向上)放燒烤架上, 以200 焗至雞肉轉為白色

3. 於雞脾肉兩面塗上預先拌勻的燒汁, 再焗3分鐘, 重複以上部驟, 焗至雞脾完全上色及金黃便可

tips : 雞脾入爐前, 可撲上一層薄生粉才焗, 可避免彈油及更香口, 啫辣的可撒上七味粉